سه‌رۆكاتيا هه‌رێمێ ده‌ست ب سه‌ر 276 مليار دينارێن بازرگانه‌كا په‌ترۆلێ دا گرت
ئه‌ڤرۆ نيوز:
ژ ئه‌نجامێ ڤه‌كۆلينا لژنه‌كا تايبه‌ت يا سه‌رۆكاتيا هه‌رێما كوردستانێ بۆ ڤه‌كۆلين د چه‌ند دوسيێن تايبه‌ت دا ب په‌ترۆل و بازرگانيكرنێ ده‌ست ب سه‌ر 276 مليار دينارێن چارخان ره‌فيق عۆمه‌ر مه‌زنه بازرگانێ په‌ترۆلێ دا گرت. ئه‌و بازرگان، هه‌ڤژينا ئاشتى هه‌ورامى وه‌زيرێ سامانێن سرۆشتى يێ حوكمه‌تا هه‌رێما كوردستانێ يه.
ژێده‌ره‌كێ ئاگه‌هدار ژ كارێن وێ لژنێ ئاشكه‌را كر كو چراخان ره‌فيق عۆمه‌ر ب ره‌نگه‌كێ نه‌يێ قانوونى بازرگانى ب په‌ترۆلێ كريه و د چه‌ند گه‌نده‌ليان دا ده‌ست هه‌بوويه، ژ به‌ر هندێ ده‌ست ب سه‌ر 276 مليار دينارێن وێ بازرگانێ دا گرتيه و ئه‌و كۆژمێ پاره‌ى ل به‌نكه‌كا هه‌رێما كوردستانێ بوويه.
ژێده‌ره‌كێ ئاگه‌هدار بۆ “وشه” دبێژيت: “نوكه د قووناغا ئێكێ دا ده‌ست ب سه‌ر وى كۆژمێ پاره‌ى دا هاتيه گرتن بۆ وێ چه‌ندێ رێيێن پێدڤى بگرنه به‌ر و هه‌ر خه‌له‌تيه‌كا هه‌ى ببينين دێ ب رێيا قانوونێ دروست كه‌ين”.
ئه‌ڤ بازرگانه ژ ئه‌گه‌رێ “قورغكرنا بازارێ و هاتنا پتريا گرێبه‌ستێن په‌ترۆلێ ب ناڤێ وێ”، دووڤچوون بۆ كاروبارێن وێ هاتيه كرن و پاشان بۆ لژنێ ده‌ركه‌فتيه كو “گه‌نده‌لى” د كارێ وێ دا هه‌يه.
ب گۆره‌ى پێزانينێن وى ژێده‌رى كو ژ به‌ر هه‌ستياريا بابه‌تى ناڤێ وى ل لايێ “وشه” يێ پاراستيه، چراخان ره‌فيق هه‌ڤژينا ئاشتى هه‌ورامى وه‌زيرێ سامانێن سرۆشتى يێ حوكمه‌تا هه‌رێما كوردستانێ د رێيا سێ كۆمپانيێن “كانديد”، “ماجستيك پاكێچ” و “ئه‌لمه‌نتق” بازرگانى ب په‌ترۆلێ كريه.
ئه‌و لژنه كو ب بڕيارا مه‌سعود بارزانى سه‌رۆكێ هه‌رێما كوردستانێ پێكهاتيه، يا رژده ل سه‌ر وێ چه‌ندێ كو ڤه‌كۆلين ل سه‌ر وان هه‌موو دوسێيان بكه‌ت كو د وارێ بازرگانيكرنێ ب په‌ترۆل و گه‌نده‌ليێ ڤه هه‌نه.
