سه‌رۆكه‌كا نوو ئه‌ڤرۆ دێ بۆ په‌رله‌مانى هێته دانان
ئه‌ڤرۆ نيوز:
ئه‌ڤرۆ په‌رله‌مانێ كوردستانێ دێ كۆم بيت و ب گۆره‌ى به‌رنامێ كارى دێ گوهۆڕين د پۆستێ سه‌رۆكا په‌رله‌مانى و چه‌ند په‌رله‌مانتاران دا هێته كرن.
ده‌سته‌يا سه‌رۆكاتيا په‌رله‌مانێ كوردستانێ ئاشكه‌را كريه كو ئه‌ڤرۆ پێنجشه‌مبى 11ى تيرمه‌ها 2019ێ دێ كۆم بيت و به‌رنامێ كارێ روونشتنا ژماره (14) يا ئاسايى راگه‌هاند.
ب گۆره‌ى راگه‌هاندنا سه‌رۆكاتيا په‌رله‌مانێ كوردستانێ، كارناما روونشتنا ئه‌ڤرۆ كو بڕياره ل ده‌مژمێر 11:00ى به‌رى نيڤرۆ ب رێڤه بچيت و ژ سێ بڕگان پێك دهێت، يا ئێكێ يا تايبه‌ته ب سووندخوارنا قانوونى بۆ وان په‌رله‌مانتارێن نوو كو دێ ل جهێ وان په‌رله‌مانتاران گرن كو پۆستێن حكومى د كابينا نوو يا حوكمه‌تا هه‌رێما كوردستانێ دا وه‌رگرتينه.
بڕگا دويێ يا كارناما روونشتنا ئه‌ڤرۆ يا په‌رله‌مانى پێكهاتيه ژ ميكانيزما هه‌لبژارتنا سه‌رۆكا په‌رله‌مانى كو به‌هرا ئێكه‌تى نشتيمانى كوردستانه و پێشتر ل لايێ پارتى بوو و بۆ وان دێ هێته ڤه‌گه‌راندن.
بڕگا سيێ ژى پێكهاتيه ژ خواندنا ئێكێ بۆ پێشنيازا بڕيارا دياركرنا رۆژا 3ى ته‌باخا 2014ێ وه‌كو رۆژا كۆمكۆژيا ئێزديان.
