سه‌رۆكێ ئيرانێ به‌رسڤا وه‌زيرێ ده‌رڤه‌يێ ئه‌مريكا دده‌ت
ئه‌ڤرۆنيوز:
ئاژانسا رويته‌رز ل سه‌ر زارێ به‌رپرسه‌كێ بلند يێ ئيرانى راگه‌هاند، ئه‌مريكا دخوازيت ب رێيا فشارێن خوه، ئيرانێ نه‌چار بكه‌ت ملكه‌چى داخوازيێن نه‌ره‌وا يێن واشنتۆن بيت.
رويته‌رز ل سه‌ر زارێ وى به‌رپرسێ ئيرانى، كو ناڤى وى نه‌ئينا، به‌لاڤكر” داخۆيانيا وه‌زيرێ ده‌رڤه‌يێ ئه‌مركا مايك پۆمپيۆ هه‌موو كۆمانێن ل دۆر هه‌لويستێ ئه‌مريكا ل به‌رابمه‌ر ئيرانێ ڤه‌ره‌ڤاندن وسه‌لماند كو واشنتۆن دڤێت رژێما ئيرانێ ب گوهۆريت”.
مايك پۆمپيۆ، وه‌زيرێ ده‌رڤه‌يێ ئه‌مريكا به‌رى دو رۆژان ستراتيژيه‌تا نوو يا ئيدارا ترامپى به‌رامبه‌ر ئيرانێ راگه‌هاند وپێشنيازا 12 خالان بۆ ئيرانێ كر، هه‌روه‌سا دووپاتكر هه‌كه ئيران
بخوازيت رێككه‌فتنه‌كا نوو يا ئه‌تۆمى بهێته كرن، پێدڤيه ل ده‌ستپێكێ هێزێن خوه ژ سووريێ ووه‌لاتێن دى يێن ده‌ڤه‌رێ ڤه‌كێشيت وهه‌موو هاريكاريێن خوه بۆ گرۆپێن تيرۆرستى وميليشيان ل ده‌ڤه‌رێ ب راوه‌ستينيت.
ژلايه‌كێ دى ڤه، حه‌سه‌ن رۆحانى سه‌رۆكێ ئيرانێ دداخۆيانيه‌كا رۆژنامه‌ڤانى دا، ره‌خنێن توند ل داخۆيانيا وه‌زيرێ ده‌رڤه‌يێ ئه‌مريكا گرتن، دوان داخۆيانيێن رۆحانى دا كو ل ئاژاسنا (ئيرنا) يا ئيرانى هاتن به‌لاڤكرن دبێژيته مايم پۆمپيۆ” تو كى تاكو بريارێ ل شوونا ئيرانێ وجيهانێ بده‌ى؟ ل ڤێ قۆناغێ جيهان رێ ناده‌ت ئه‌مريكا بريارێ ل شوونا بده‌ت، چونكى چه‌ند وه‌لاتێن سه‌ربخوه يێن هه‌ين وئه‌م ژى ب پشته‌ڤانيا گه‌لێ خوه دێ ل رێيا خوه به‌ردده‌وام بين”.