سه‌رۆكێ كۆمه‌لا به‌ژن كۆرتا: دێ چينه به‌غدا
ئه‌ڤرۆ نيۆز:
ئه‌ڤرۆ رۆژا جيهانى يا خودان پێدڤيێن تايبه‌ته وكۆمه‌لا به‌ژن كۆرتێن كوردستانێ ژى ئاماژێ ب وێ چه‌ندێ دكه‌ت، ژبه‌ر قه‌يرانا دارايى، نه‌شێن چو چالاكيه‌كێ ئه‌نجام بده‌ن.
عومه‌ر جه‌بار، سه‌رۆكێ كۆمه‌لا به‌ژن كۆرتێن كوردستانێ راگه‌هاند، ئه‌ڤرۆ رۆژا جيهانى يا خودان پێدڤيێن تايبه‌ته وژبه‌ر قه‌يرانا دارايى ئه‌م نه‌شێين وێ رۆژێ ساخ بكه‌ين وهه‌موو چالاكيێن خوه دێ راگرين.
عومه‌رى ئاماژه كر، ده‌ركرنا به‌ياننامه وياداشتناما ل ڤێ رۆژێ دێ روو ب روويێ حوكمه‌تێ وپه‌رله‌مانى كه‌ين، به‌لێ حوكمه‌تێ مووچێ مه ژ 150 هزار ديناران يێ كريه 90 هزار دينار.
سه‌رۆكێ كۆمه‌لا به‌ژن كۆرتێن كوردستانێ زيده‌تر بۆ خه‌ندان گۆت، مافێ خودان پێدڤيێن تايبه‌ته ل قوتابخانا وجهين گشتى كو بارێ ژيانا وان ل به‌رچاڤ بهێته وه‌رگرتن وكارئاسانى بۆ بهێنه كرن وژ روويێ ساخله‌ميێ ڤه مافێ وان يێ پاراستى بيت.
ناڤبرى دياركر ژى، هه‌موو خودان پێدڤيه‌كا تايبه‌ت 90 هزار دينار بۆ دهيته مه‌زاختن، دده‌مه‌كى دا ل وه‌لاتێن دى هه‌ر كه‌سه‌كێ رێژا كێم ئه‌نداميا وى چه‌ند بلندتر بيت مووچێ وى يێ پتره.
ئه‌وژى گۆت، گه‌له‌ك خودان پێدڤيێن تايبه‌ت يێن هه‌ين كو ژيانا هه‌ڤژينيێ يا هه‌لوه‌شاندى ژبه‌ركو شيانێن كرێكرنا خانيان نه‌بوو، يان ژى شيانێ دابينكرنا پيدڤيێن رۆژانه نه‌بوون. عومه‌رى رۆهنكر، ل چه‌ند رۆژێن داهاتى دا، ژبۆ گه‌هاندنا كێشه وداخوازيێن خودان پێدڤيێن تايبه‌ت، دێ سه‌ره‌دانا به‌غدا كه‌ت، چونكى به‌رى نوكه حوكمه‌تا هه‌ريمێ پاداشت وبه‌ياننامه ژ مه وه‌ردگرتن، به‌لێ نوكه وان ژى ژمه وه‌رناگريت.
