سه‌رۆك بارزانى: ده‌م یێ هاتى گه‌لێ كوردستانێ بڕیارا چاره‌نڤیسێ خوه بده‌ت
ئه‌ڤرۆ نیوز:
سه‌رۆك مه‌سعود بارزانى سه‌باره‌ت مافێ چاره‌نڤیسێ گه‌لێ كورد، راگه‌هاندنه‌ك به‌لاڤكریه و ئاماژه ب وێ یه‌كێ كریه كو ده‌مه‌كه ژماره‌كا سیاسیێن ناڤخۆ و كاربده‌ستێن ولاتێن ئه‌قلیمى دزانن كو ده‌لیڤه‌كا زێرین بۆ سه‌ربخۆییا هه‌رێما كوردستانێ هه‌یه ، له‌ورا داخویانیێن نه‌راست سه‌باره‌ت مافێ گه‌لێ كوردستانێ د دیاركرنا چاره‌نڤیسێ خوه و ریفراندومێ د ده‌ن و دڤێتن ڤێ ده‌لیڤێ ژبن ببه‌ن.
بارزانى هه‌روه‌سا دیاركریه: ئه‌گه‌ر گه‌لێ كوردستانێ چاڤه‌رێى وێ یه‌كێ بیت كو سه‌ربخوه‌ییێ وه‌كو دیارى بۆ بهێته پێشكێش كرن، ئه‌ڤه چ ده‌مه‌كێ سه‌ربه‌خوییێ بده‌ستڤه نائینیت، ئه‌و ماف هه‌بوونا وێ هه‌یه و پێدڤیه گه‌لێ كوردستانێ داخواز بكه‌ت و بجهبینیت.
” داخازكرنا چاره‌نڤیسی بۆ گه‌لێ كورد مافه و پێدڤی زه‌مینه‌سازیێ نینه، ئه‌و ئالیێن ناڤخۆ یێن ته‌كه‌زێ ل سه‌ر زه‌مینه‌سازیێ دكه‌ن، هه‌ر ئه‌و ئالی د پاشه‌رۆژێ دا دێ بێژن سه‌ركرداتییا سیاسییا كوردی ده‌لیڤه‌ك ژ ده‌ست دا و بكارنه‌ئینا.”
بارزانى دیاركریه ئه‌وێن بووینه ئه‌گه‌رێن دابه‌شبوونا كوردستانێ، باش دزانن كو چ شاشیه‌كا دیرۆكى یا مه‌زن ئه‌نجامداینه، به‌لێ د به‌رهه‌ڤ نینن دانپێدانێ ب فه‌شه‌لا سیاسه‌تا خوه یا سه‌د سالى بكه‌ن.
