سه‌رۆك بارزانى: ریفراندۆم ئه‌گه‌رێ كێشێن نهایێن كوردستانێ نینه
ئه‌ڤرۆ نیوز:
سه‌رۆك بارزانى ئه‌ڤرۆ دگه‌ل ئه‌ندام په‌رله‌مان و جڤات و سه‌ركرداتییا پارتى ل سنۆرێ كه‌ركووك – گه‌رمیان كۆمبوو و راگه‌هاند” ریفراندۆم ئه‌گه‌رێ كێشێن نهایێن كوردستانێ نینه، به‌غدا ژ مێژه پلانا داگیركرنا ده‌ڤه‌رێن كوردستانى دانابوو، لێ ریفراندۆم كره به‌هانه‌بوو بۆ داگیركرنا كه‌ركووكێ”.
بارزانى راگه‌هاند ژى كو گه‌لێ كوردستانێ نه‌شكه‌ستی یه، به‌لكو خیانه‌ت لێ هاتیه كرن و هه‌موو ئالى ژى پشتراستكرن كو ئه‌نجامێن ریفراندۆمێ ب چ حكومه‌ت و یاسایان ناهێنه هه‌لوه‌شاندن.
سه‌رۆك بارزانى داخواز ژ خه‌لكێ كه‌ركووك و ده‌ڤه‌رێن كوردستانى ژى كر، خوراگربن و ئیرادا وان بهێز بیت، ژبه‌ركو گه‌لێ كوردستانێ نه‌شكه‌ستی یه، به‌لكو خیانه‌ت لێ هاتیه كرن.
بارزانى دا زانین ژى: گه‌ر خیانه‌ت نه‌با كوردستان دا د ره‌وشه‌كا دى دا بیت، لێ تاقمه‌كى پشتا خوه دا گه‌لێ كوردستانێ و كه‌ركووك فرۆشت و نها ژى داگیركرنا كه‌ركووكێ ناسناما وێ یا كوردستانى ناگوهۆریت و سه‌پاندنا كه‌توارى ل كه‌ركووك و ده‌ڤه‌رێن دى یێن كوردستانى ناهێته قه‌بوول كرن و ره‌وشا نها یا ده‌مكی یه و دێ ده‌رباز بیت.
