سه‌رۆك بارزانى سزايێ سێداره‌دانێ ل سه‌ر بكۆژێ مينايێ ئيمزا كر
ئه‌ڤرۆ نيوز:
مه‌سعود بارزانى سه‌رۆكێ هه‌رێما كوردستانێ بڕيارا سێداره‌دانا بكۆژێ مينايا 18 هه‌يڤى ئيمزا كر و بابێ زارۆيێ ژى گۆت: “بارزانى سۆزا خوه ب جهـ ئينا”.
رۆژا 9ى تيرمه‌ها 2016ێ كچه‌كا 18 هه‌يڤى ب ناڤێ مينا مێڤان محه‌مه‌د روونشتڤانا تاخێ سه‌رهلدان ل باژێرێ دهۆكێ به‌رزه بوو و پشتى 10 رۆژان ته‌رمێ مينايێ يێ پارچه پارچه‌كرى ل گۆندێ وان “به‌رئاشێ” هاته ديتن. كۆشتنا مينايێ كارڤه‌ندانێن مه‌زن لێكه‌فتن، ب تايبه‌ت پشتى ده‌ركه‌فتى كو ئه‌و كه‌سێ ئه‌و تاوان ئه‌نجام دايى ڤيابوو ده‌ستدرێژيا سكسى بكه‌ته سه‌ر.
ليوا تارق ئه‌حمه‌د رێڤه‌به‌رێ پۆليسێن پارێزگه‌ها دهۆكێ گۆت: “كه‌سوكارێن وێ زارۆيێ هه‌ر ژ ده‌سپێكێ گۆمان ل سه‌ر خزمه‌كێ خوه هه‌بوو. پشتى دووڤچوونا پۆليسان، ديار بوو ژ لايێ وى گه‌نجى ڤه هاتيه ره‌ڤاندن و پاشان ل گۆندێ خوه خه‌ندقانديه، ئه‌وى گه‌نجى دان ب وێ چه‌ندێ ژى كر كو دڤيا ده‌ستدرێژيا سكسى بكه‌ته سه‌ر و پاشان كوشتيه”.
پشتى روودانێ، مه‌سعود بارزانى، سه‌رۆكێ هه‌رێما كوردستانێ په‌يوه‌ندى ب مێڤان محه‌مه‌د يێ بابێ مينايێ كريه و ژبلى سه‌ره‌خۆشيێ، سۆز دايه كو دووڤچوونه‌كا هوور بۆ كه‌يسێ كوشتنا مينايێ بكه‌ت.
رۆژا 10ى خزيرانا 2016ێ دادگه‌ها تاوانان ب گۆره‌ى مادێ 406 ژ قانوونا سزايێن عيراقى بڕيارا سێداره‌دانێ بۆ “ع.ح.ع” يێ 22 سالى ده‌ركر. دادگه‌ها پێداچوونێ ژى ل رۆژا 10ى چريا ئێكێ سزا په‌سه‌ند كر.
ب گۆره‌ى پێزانينێن ل به‌ر ده‌ست رۆژا 27ى چريا دويێ 2016 مه‌سعود بارزانى سه‌رۆكێ هه‌رێما كوردستانێ ئيمزا ل سه‌ر بڕيارا دادگه‌هێ كر.
سه‌رۆكێ هه‌رێما كوردستانێ ب پشت به‌ستن ب برگا 7 ژ ماددێ 10 يێ قانوونا سه‌رۆكاتيا هه‌رێما كوردستانا عيراقێ ژماره 1 يا سالا 2005 يێ راستڤه‌كرى برگا “ب” ژ مادێ 385 يێ قانوونا بنه‌مايێ دادگه‌ها سزايێن عيراقى ژماره 33 يا سالا 1971 يا راستڤه‌كرى ئه‌و بڕياره ل دژى بكوژێ وێ زارۆيێ په‌سه‌ه‌ند كر.
مێڤان محه‌مه‌د بابێ مينايێ گۆت: “سه‌رۆكێ هه‌رێما كوردستانێ سۆزا خوه ب جهـ ئينا، ئه‌م سۆپاسيا وى دكه‌ين. ئه‌ڤ تاوانا به‌رامبه‌ر مه هاتيه كرن، گه‌له‌ك يا مه‌زن بوو. پێدڤيه ئه‌وێن تاوانێن هۆڤانه يێن ژ ڤى ره‌نگى دكه‌ن بهێنه سێداره‌دان”.
ژێده‌ر: رووداو
ئه‌ڤرۆ نيوز دانپێدانێن بكوژێ مينايێ ل دادگه‌هێ و داخوازيا بابێ وێ به‌لاڤ دكه‌ت
