سه‌رۆك بارزانى ل دهۆكێ: هه‌لبژارتن باشترين چاره‌سه‌ره بۆ قه‌يرانێن هه‌رێما كوردستانێ
ئه‌ڤرۆنيوز:
سه‌رۆك بارزانى ئه‌ڤرۆ دوشه‌مبى 18/12/2017، ل باژێرێ دهۆكێ ل گه‌ل هژماره‌كا راگر ومامۆستايێن زانكۆيێن دهۆكێ كۆمبوو.
دوێ كۆمبوونێ دا،مامۆستايێن زانكۆيێن دهۆكێ ب گۆره‌ى بسپۆرى وشاره‌زاييێن خوه دبوارێن جۆراوجۆر دا ددانوستاندنه‌كا تيروته‌سه‌ل دا چه‌ندين تێبينى وپيشنيار وپرسيار ل دۆر ره‌وشا سياسى ودستوورى يا عيراقێ وپه‌يوه‌نديێن دناڤبه‌را هه‌ولێرێ وبه‌غدا وريفراندۆما گه‌لێ كوردستانێ، هه‌روه‌سا ره‌وشا خه‌لكى وكێشه وقه‌يرانێن دارايى وئابوورى يێن هه‌رێما كوردستانێ وپرسا خزمه‌تگوزارى وبه‌رهنگاريا گه‌نده‌ليێ وئه‌نجامدانا چاكسازيان ل كه‌رتێن جۆراوجۆر، ئاراسته‌ى سه‌رۆك بارزانى كر.
سه‌رۆك بارزانى، زێده‌بارى ده‌ربرينا سوپاس وپێزانيننێن خوه بۆ پێشنيار وتێبينيێن مامۆستايان، به‌رسڤا پرسيار وتێبينيێن به‌رهه‌ڤبوويان دا ودگۆتاره‌كێ دا ره‌وشا سياسى يا كوردستانێ و عيراقێ وهه‌لويستێ جڤاكێ نێڤده‌وله‌تى ل به‌رانبه‌ر بريارا ريفراندۆما گه‌لێ كوردستانێ شرۆڤه‌كر، هه‌روه‌سا رۆناهى خسته سه‌ر روودانێن 16 ئوكتۆبه‌رێ وقۆناغا پشتى ريفراندۆمێ وئه‌و رێگريێن هاتينه خستن ل به‌رده‌م ژيان وبريارا خه‌لكێ كوردستانێ.
دپشكه‌كا دى يا په‌يڤێن خوه دا، سه‌رۆك بارزانى ئه‌نجامدانا هه‌لبژارتنان ب باشترين چاره‌سه‌ر بۆ قه‌يرانێن هه‌رێما كوردستانێ زانى ودووپاتى ل وێ چه‌ندێ كر كو ئه‌ڤ قۆناغا ب زه‌حمه‌ت دێ ده‌ربازبيت ول دووماهيێ گه‌لێ كوردستانێ دێ سه‌ركه‌ڤيت، چونكى پرسا وى ياره‌وياه وسته‌م ژى ل كه‌سێ نه‌كريه.
