سه‌رۆك بارزانى:يێ په‌شێمان نينم ژ ريفراندۆمێ وچو جاران په‌شێمان نابم
ئه‌ڤرۆنيوز:
سه‌رۆك مه‌سعود بارزانى دديداره‌كێ دا ل گه‌ل كه‌نالێ بى بى سى يێ بريتانى راگه‌هاند ئه‌و يێ په‌شێمان نينه ژ ريفراندۆمێ وچو جاران ژى ژ ده‌نگێ سێ مليۆن ده‌نگده‌ران ئه‌وێن ده‌نك بۆ سه‌ربخوه‌يا كوردستانێ داى په‌شێمان نابيت، ئاماژى دا ژى كو كه‌ركووك يا داگيركريه وگه‌لێ كوردستانێ وجڤاكێ نێڤده‌وله‌تى دزانيت ئه‌و گرۆپێ خيانه‌ت كرى ل دۆر كه‌ركووكێ كى يه.
ده‌قێ ديدارا سه‌رۆك بارزانى ل گه‌ل كه‌نالى بى بى سى يێ بريتانى:
- دخوازم ب كۆمێنتا هه‌وه‌يێن به‌رێز ده‌ستپێبكه‌ين ل دۆر ئۆپه‌راسيۆنا توركيا كو نوكه بۆ سه‌ر عه‌فرينێ دهيته كرن؟
سه‌رۆك بارزانى: ئه‌م دنيگه‌رانين وهيڤى خوازين ئه‌و ئۆپه‌راسيۆنه ب زووترين ده‌م ب دووماهى بهێت، چونكى چو ده‌مه‌كى شه‌ر وتوندوتيژى چاره‌سه‌رى نينه بۆ كێشان.
- ئايا دێ هوون هێزا پێشمه‌رگه‌ى بۆ ڤى شه‌رى هنێرن بۆ پشته‌ڤانيكرنا يه‌په‌كێ؟
سه‌رۆك بارزانى: ڤرێكرنا پێشمه‌رگه‌ى بۆ ڤى شه‌رى كێشێ چاره‌سه‌ر ناكه‌ت، باشترين پالپشتى كو بشێين بكه‌ين ئه‌وه كو بزاڤێ بكه‌ين هێرش ب دووماهى بهێن.
- پشتى سالا 2003 كوردستان وه‌كو نموونه‌كا پێشكه‌فتى دهاته سه‌حكرن وپێشڤه‌چوون دچه‌ندين بواراندا ب خوه‌ڤه ديتبوو، ب ديتنا هه‌وه ئه‌ڤ بابه‌تێ هه‌وه خسته دمه‌ترسيێ دا وئێدى وه‌كو به‌رێ نه‌مايه؟
سه‌رۆك بارزانى: من يا گۆتى ئه‌ز يێ په‌شێمان نينم وچو جاران په‌شێمان نابم، دوباره ژى دێ بێژم ژده‌نگێ سێ مليۆن ده‌نگده‌ران په‌شێمان نابم، ريفراندۆم يا سه‌ركه‌فتى بوو، چونكى 93% ژ خه‌لكى ده‌نگێ (به‌لێ) بۆ سه‌ربخوه‌يێ دا.
- هوون دبێژن يا سه‌ركه‌فتى بوو، به‌لێ ل سه‌ر ئه‌ردێ واقعى ب شێوه‌كى دى يه، هوون نه‌گه‌هشتن ئارمانجا خوه وسه‌ربخوه نه‌هات؟
سه‌رۆك بارزانى: ئه‌وا نوكه ئه‌م دبينين ژ ئه‌نجامێ سياسه‌تا به‌غدايه كو ل سالا 2014 بودجا خه‌لكێ كوردستانێ بريه، هه‌روه‌سا شه‌رێ دژى داعشێ وهاتنا خوار يا بهايێ په‌ترۆلێ بوونه هۆكار بۆ ڤێ ره‌وشێ، ل بيرا هه‌وه بيت مه نێزيكى دو مليۆن ئاواره وپه‌نابه‌ران ژى يێن هه‌ين، كه‌واته بۆچى ريفراندۆمێ ب نه‌سه‌ركه‌فتى بزانين.
- ئه‌مريكا وجڤاكێ نێڤده‌وله‌تى پێشتر بۆ هه‌وه دياركر كو ده‌مێ ريفراندۆمێ يێ گونجاى نينه، هه‌كه بزڤرن وى ده‌مى، ب ديتنا هه‌وه پێدڤى بوو هه‌وه گوهێ خوه دابا پێشنيارێن ئه‌مريكا؟
سه‌رۆك بارزانى: به‌رى هه‌موو تشته‌كى، ئه‌نجامدانا ريفراندۆمێ تاوان نينه، ملله‌ته‌كى خواستا خوه بۆ پاشه‌رۆژێ ب رێيه‌كا ئاشتيانه ده‌ربرى، ئه‌وێن دگۆت ده‌مێ وێ يێ گونجاى نينه، چو ده‌مێن گونجاى وه‌كو به‌ديل پێشنياز نه‌كريه وچو شوينگر ژى به‌رچاڤ نه‌كر، ريفراندۆم تاوان ننيه ورێيه‌كا ديموكراسيانه ومافێ ملله‌ته‌كى يه.
- به‌لێ دئه‌نجامدا كه‌ركووك وچه‌ند ده‌ڤه‌رێن دى هاتن ژده‌ستدان، هه‌كه سه‌حكه‌ينه به‌رێ، ب ديتنا هه‌وه ئه‌ڤه شاشى بوون؟
سه‌رۆك بارزانى: ئه‌ز ب شاشى نزانم وژئه‌نجامدانا ريفراندۆمێ ژى يێ په‌شێمان نينم، ئه‌وا ل كه‌ركووكێ رووداى خيانه‌ته‌ك بوو ژلايێ گرۆپه‌كێ ناڤخوه‌يێ كوردستانێ، من پێشتر ژى يا گۆتى پيدڤيه كه‌ركووك وه‌كو نموونه‌يه‌كا پێكڤه‌ژيانێ بمينيت.
- ده‌مێ به‌حسێ خيانه‌تێ دهێته كرن، وه‌سا دياردبيت كو ده‌رزه‌ك يا دناڤمالا كوردى دا هه‌ى، مه ل گه‌ل خه‌لكى ژى ل كه‌ركووكێ وهه‌ولێرێ ئاخڤت وهه‌موويان دگۆت پشتى كێشێن كه‌ركووكێ ژروويێ ئه‌منى وئابوورى ڤه زياندار بووين، ئه‌وان گازنده ژ به‌غدا دكرن، به‌لێ گازندێ ژ سه‌ركردايه‌تيا كوردستانێ ژى دكه‌ن، بۆچى ئه‌ڤه روودا؟
سه‌رۆك بارزانى: به‌رى ريفراندۆمێ ژى دهاته گۆتن كو ده‌رزه‌ك ل ناڤمالا كوردى دا يا هه‌ى، به‌لێ راستى ئه‌وبوو كو زێده‌تر ژ 93% خه‌لكى ده‌نگێ (به‌لێ) بۆ سه‌ربخوه‌يێ دا وپشكداريه‌كا به‌رچاڤ هه‌بوو، هه‌كه بزاڤ بۆ ئازاديێ وسه‌ربخوه‌يێ هه‌بيت، دێ قوربانى ژى هه‌بيت، گه‌لێ كوردستانێ ژى به‌رده‌وام ئه‌و قوربانيى يا داى، ئه‌نجامدانا ريفراندۆمێ دژى دستوورێ عيراقێ نه‌بوو، هه‌كه خيانه‌تا وێ گرۆپێ ل ناڤخوه‌يا كوردستانێ نه‌با، خه‌لكى وه‌كو ڤى شێوێ نوكه ئازار نه‌دديت، به‌لێ ئه‌و ره‌وشه ژى يا ده‌مكى يه ومه باوه‌رى يا هه‌ى خه‌لكێ مه دێ ژڤێ قۆناغێ ده‌رباز بيت.
- ئانكو هوون دهه‌ڤرانه كو ئه‌وا ل كه‌ركووكێ رووداى ژ ئه‌نجامێ ده‌رزه‌كێ بۆ دسه‌ركردايه‌تيا كوردستانێ دا؟
سه‌رۆك بارزانى: ريفراندۆم برياره‌كا كه‌سايه‌تى نه‌بوو، يان ئێك لايه‌نێ سياسى وچه‌ند لايه‌نه‌ك نه‌بوو، به‌لكو بريارا هه‌موو پارتان وپه‌رله‌مانى وخه‌لكێ كوردستانێ بوو، هنده‌ك لايه‌نان تێبينى ل سه‌ر ده‌مێ وێ هه‌بوو، به‌لێ ئه‌وژى دژى ريفراندۆمێ نه‌بوون، ئه‌وا ل كه‌ركووكێ رووداى ژئه‌نجامێ ده‌رزه‌كێ دناڤمالا كوردى دا نه‌بوو، به‌لكو ئه‌نجامێ خيانه‌تا گرۆپه‌كێ بوو دناڤ كوردان ب خوه‌دا.
- كێ خيانه‌ت كر؟
سه‌رۆك بارزانى: خه‌لكێ كوردستانێ وجڤاكێ نێڤده‌وله‌تى ژى دزانيت كى بوون.\
- دهێته گۆتن ريفراندۆمێ په‌يوه‌ندى ب پرسا نه‌ته‌وى ڤه نه‌بوو، زێده‌تر بۆ ده‌ستهه‌لاتا سياسى وكونترۆلكرنا په‌ترۆلا كوردستانێ بوو؟
سه‌رۆك بارزانى: گرنگترين خال ئه‌وه كو 93% خه‌لكى ده‌نگ بۆ دا، ئه‌و جۆرێ دى يێ خه‌لكى يێ شرۆڤه‌كا دى بۆ دكه‌ت ل ده‌ف مه بهايێ خوه نينه.
- ل دۆر كه‌ركووكێ، ئايا كه‌ركووك دێ دده‌ستێ حوكمه‌تا عيراقێ دا مينيت، يان ل پاشه‌رۆژێ دێ ب چ شێوه‌كى بيت؟
سه‌رۆك بارزانى: دانوستاندن نوكه يا به‌رده‌وامه، كه‌ركووك وده‌ڤه‌رێن كوردستانى يێن دى نوكه دداگيركرى نه وپێدڤيه ئه‌ڤ كێشه ل دززڤ دستوورێ عيراقێ بهێته چاره‌سه‌ركرن.
- ئانكو هوون دبێژن كه‌ركووك يا داگيركريه؟
سه‌رۆك بارزانى: به‌لێ، نوكه يا داگيركريه
- نيزيكبوونه‌ك بۆ رێككه‌فتنێ ل سه‌ر ئيدارا هه‌ڤپشك ل كه‌ركووكێ هه‌يه؟
سه‌رۆك بارزانى: دانوستاندن هه‌تا نوكه يا به‌رده‌وامه ل گه‌ل به‌غدا وهيڤيدارين بگه‌هينه رێككه‌فتنێ، به‌لێ به‌رده‌واميدان ب سه‌پاندنا ئه‌مرێ واقع، ناهێته قه‌بوولكرن.
- هه‌كه دانوستاندن نه‌گه‌هنه ئه‌نجامه‌كى، وى ده‌مى دێ چ كه‌ن؟
سه‌رۆك بارزانى: هيڤيدارين دسه‌ركه‌فتى بن، به‌لێ هه‌كه نه‌گه‌هشتنه ئه‌نجامه‌كى، وى ده‌مى دێ بريارێ ده‌ين.
