سه‌رۆك بارزانى په‌يامه‌ك ئاراسته‌ى گه‌لێ فره‌نسا كر
ئه‌ڤرۆ نيوز:
پشتى كريارا تيرۆرستى يا شه‌ڤا بۆرى ل پاريس كو تێدا زێده‌تر ژ 120 كه‌سان هاتينه كوشتن و 200 كه‌س ژى بريندار بووينه، مه‌سعود بارزانى سه‌رۆكێ هه‌رێما كوردستانێ په‌يامه‌ك ئاراسته‌ى سه‌رۆكێ فره‌نسا كر.
بارزانى د په‌ياما خوه دا نڤيسيه: گه‌لێ كوردستانێ نوكه د شه‌ره‌كێ دژوارێ دژى تيرۆرێ دايه و قوربانيا ده‌ستێ تيرۆرێ يه، د ڤێ رۆژا نه‌خۆش دا، ل گه‌ل هه‌وه هه‌ڤخه‌مىن و پشكدارى خه‌ما هه‌وه‌ينه و پشته‌ڤانيا گه‌ل م حوكمه‌تا فره‌نساينه”,
ده‌قێ راگه‌هاندنا سه‌رۆكێ هه‌رێمێ:
ئەو کريارێن تيرۆریستیێن شەڤا ١٣-١١-٢٠١٥ ل پاریسێ روو دا و ھژمارەکا زێدە يا کەسان بوونە قوربانی ئه‌م ژ كوور ڤە ئێشاندين. ب ناڤێ خوە و گەلێ کوردستانێ ھەڤخەمیا خوە ب جەنابێ هه‌وە و گەلێ فرانسا رادگه‌ھینم.
تيرۆر دوژمنێ ھەڤبپشكێ مە ھەموویانە و تيرۆریست دژی ھەموو بھایەکێ مرۆڤایەتیێ نە و ل ھەر جیھەکە ژیان و پێشکەفتن و ئارامی ھەبيت تيرۆریستێن دلرەش هێرش دکه‌نێ.
گەلێ کوردستانێ کو نھا د شەرەکێ دژوار یێ دژی تيرۆرێ دایە و قوربانى دەستێ تيرۆرێ يه، د ڤێ رۆژا نەخوەش دا، ل گەل هه‌وە ھەڤسۆزە و پشكدارێ خەما هه‌وە يه و پالپشتێ گەل و حکومەتا فره‌نسایە.
سەرخوەشیێ ل هه‌وەیێن به‌رێز و کەسوکارێن قوربانیان دکه‌ين و ھيڤیا باشبوونەکا ب لەز ژ بۆ برینداران دخوازین.
مەسعود بارزانی
سەرۆکێ ھەرێما کوردستانێ
١٤-١١-٢٠١٥