سه‌رۆك بارزانی:ب پشته‌ڤانيا گه‌لێ مه پارتی دێ سه‌ركه‌فتنه‌كا مه‌زن ب ده‌ستڤه‌ئينيت
ئه‌ڤرۆنيوز:
سه‌رۆك مه‌سعود بارزانى ئه‌ڤرۆ پێنجشه‌مبى ل گه‌ل كادرێن لقێن سنورێ جڤاتا سه‌ركردايه‌تيا پاريزگه‌ها هه‌ولێرێ يا پارتى ديموكراتى كوردستان كۆمبوو.
سه‌رۆك بازرانى سوپاسيا كادرێن پارتى كر كو ب خۆراگرى وباوه‌رى ب خوه‌بوون دده‌مێ ته‌نگاڤ دا ل سه‌نگه‌رێن پاراستنا كوردستانێ بوون. هه‌روه‌سا سوپاسيا خۆراگريا خه‌لكێ كوردستاێ وقه‌هره‌مانيا پێشمه‌رگى كر ل شه‌رێ دژى تيرۆرستان وشه‌رێ به‌رگريێ ژ كه‌رامه‌ت وئاخا نيشتمانى وراگه‌هاند” ئه‌م هه‌موو قه‌ردارێن پێشمه‌رگه‌ينه، چونكى تنێ پێشمه‌رگه بوو هه‌موو هه‌ڤكێش گوهۆرين وكوردستان پاراست”.
ل دۆر هه‌لبژارتنێن كوردستانێ، سه‌رۆك بارزانى گۆت”ب پشته‌ڤانيا گه‌لێ مه، پارتى دێ سه‌ركه‌فتنه‌كا مه‌زن ب ده‌ستڤه‌ئينيت وب وێ سه‌ركه‌فتنێ حوكمه‌ته‌كا ب هێز دێ هێته پێكئينان كو بشێت چاكسازيا دهه‌موو بوارێن ژيانا سياسى وئابوورى وئيدارى ل هه‌رێما كوردستانێ بكه‌ت”.
سه‌رۆك بارزانى، داخواز ژ كادرێن پارتى كر كو دپێگير بن ب قانوونێ وئارامترين شێوه بانگه‌شا هه‌لبژارتنان بكه‌ن وبه‌رسڤا ته‌شهير وبێ رێزيان نه‌ده‌ن وده‌مێ ل جهه‌كێ دى وێنێن به‌ربژارين پارتى دهينه دراندن، هه‌كه هوون وێنێن به‌ربژارێن وان ببينن كه‌فتينه سه‌ر ئه‌ردى، وێنێن وان دروست بكه‌ن.
دياركر ژى” پارتى خودان ئارمانجا ستراتيژيه ول دووڤ سياسه‌تا رۆژێ هه‌لويستى ناگوهۆرين وچو پاشه‌كه‌شێ ژى ژ وێ ئارمانجا ستراتيژى ناكه‌ين، هه‌ر كه‌س ولايه‌نه‌كێ ئارمانجا ستراتيژى هه‌بيت، پێدڤيه به‌رهه‌ڤ بيت گيانێ خوه ژبۆ به‌خش بكه‌ت، له‌وما پارتى به‌رده‌وام ژبۆ پاراستن وبه‌خته‌وه‌ريا گه‌لێ مه خوه به‌خش دكه‌ت”.
