سه‌نده‌ى ته‌لگراف: 10 هزار چه‌كدارێن داعش نێزيكى به‌غدا دبن
رۆژناما سه‌ندى ته‌لگران د هژمارا خوه يا رۆژا ئێكشه‌مبى دا دياركر كو 10 هزار چه‌كدارێن داعش يێن نێزيكى پايته‌ختێ عيراقێ به‌غدا بووين دا كو ژ ناڤ ببه‌ن.
مالپه‌رێ شه‌فه‌ق نيوز به‌لاڤكريه كو رۆژناما سه‌نده‌ى ته‌لگراف يا بريتانى ل زارده‌ڤێ به‌رپرسه‌كێ پله بلندێ عيراقى به‌لاڤكريه كو ب ده‌هان هزار چه‌كدارێن داعش يێن خوه ئاماده دكه‌ن دا كو به‌غدا ژ ناڤ ببه‌ن و ئاماژێ ب وێ چه‌ندێ ژى دكه‌ت كو نوكه ب تنێ 13 كيلۆمه‌تران ژ به‌غدا د دوورن.
ڤێ رۆژناما بريتانى ژ زارده‌ڤێ به‌رپرسێن عيراقى ئاشكه‌را كريه يێن گازيا خوه گه‌هاندينه ئه‌مريكا كو هێزێن سه‌ر ئه‌ردى ل ده‌وروبه‌رێن به‌غدا به‌لاڤ كه‌ن دا كو وان بپارێزن و به‌غدا نه‌كه‌ڤيته ده‌ستێ داعش.
ب گۆره‌ى ئه‌ڤا شه‌فه‌ق ژ سه‌نده‌ى ته‌لگراف به‌لاڤكرى هاتيه: “زێده‌بوونا بزاڤێن جيهادى ده‌رگه‌هه‌كێ مه‌زن ل هه‌مبه‌ر گه‌له‌ك بۆچوونان ڤه‌دكه‌ت كو دبيت چوونا داعش بۆ كۆبانێ ب تنێ وه‌كو ته‌پكه‌كێ بيت كو هه‌موو خه‌لكى پێڤه مژوول بكه‌ت و د بنيات دا وێ بۆ هندێ بيت خوه بۆ جهه‌كێ مه‌زنتر و به‌رفره‌هتر ئاماده بكه‌ت”.
سه‌رۆكێ جڤاتا پارێزگه‌ها ئه‌نبار سه‌باح كه‌رحوت به‌رى نوكه هوشداريا كه‌فتنا به‌غدا ل سه‌ر ده‌ستێ داعش دابوو، پشتى كۆنترۆلا گه‌له‌ك ده‌ڤه‌رێن پارێزگه‌ها ئه‌نبار كرين.
پێشتر تشاك هيگل وه‌زيرێ به‌ره‌ڤانيا ئه‌مريكا ژى دا بوو زانين كو نوكه به‌غدا يا ل ژێر كۆنترۆلا هێزێن عيراقى.
