سوبه‌هى وه‌زيرێ چاندنێ دێ چيته په‌رله‌مانى
ئه‌ڤرۆ نيوز، نيوار محه‌مه‌د سه‌ليم:
بڕياره سوبه‌هى 18\12\2014 روونشتنا هژماره 17 يا خولا گرێدانا سالا دويێ يا په‌رله‌مانێ كوردستانێ بهێته گێران كو دێ دو پشكان ب خوه ڤه گريت يا ئێكێ دانوستاندن بيت ل سه‌ر سێ پرۆژێن قانوونا و يا دويێ ژى دێ يا تايبه‌ت بيت ب مێڤانكرنا وه‌زيرێ چاندنێ ل حوكمه‌تا هه‌رێما كوردستانێ.
به‌شار مشير، ئه‌ندامێ لژنا چاندنێ ل په‌رله‌مانێ كوردستانێ بۆ ئه‌ڤرۆ نيوز گۆت: “ل سه‌ر داخوازا خوه وه‌زيرێ چاندێ و ژێده‌رێن ئاڤێ ل حوكمه‌تا هه‌رێما كوردستانێ سوبه‌هى دێ سه‌ره‌دانا په‌رله‌مانێ كوردستانێ كه‌ت و ل وێرێ دێ گۆتاره‌كێ پێشكێش كه‌ت”.
زێده‌تر گۆت: “گۆتارا وى دێ يا تايبه‌ت ب ره‌وشا چاندنێ ڤه و چاوانيا پشته‌ڤانيكرنا ڤى كه‌رتى و چاوانيا مفا وه‌رگرتنێ ژ به‌رهه‌مێ جۆتياران و هاريكاريكرنا وان”.
ئاماژه ب وێ چه‌ندێ ژى كر كو پشتى ب دووماهى هاتنا گۆتارا وى ژى دێ په‌رله‌مانتار پرسيار و پێشنيازێن خوه ژ وه‌زيرێ چاندنێ كه‌ن.
ل دۆر وێ چه‌ندێ كا وه‌كو ئه‌ندامێ لژنا چاندنێ ل په‌رله‌مانێ كوردستانێ چو بۆ پێشخستنا كه‌رتێ چاندنێ كريه، يان ژى چو هه‌ڤكارى د ناڤبه‌را وان و وه‌زاره‌تێ دا هه‌يه، بشار مشير گۆت: “مه وه‌كو لژنا چاندنێ ل په‌رله‌مانێ كوردستانێ پرۆژێ قانوونه‌كێ به‌رهه‌ڤكريه كو دشێين بێژين سندوقا پشته‌ڤانيكرنا جۆتيارايه و خواندنا ئێكێ ژى بۆ هاتيه كرن، به‌لێ ژ به‌ر قانوونێن گرێدايى ده‌مى يێن وه‌كو كۆمسيۆنا هه‌لبژارتنان و دستوورێ هه‌رێمێ هاتيه پاشخستن، هه‌كه ده‌نگدان ل سه‌ر وێ قانوونێ هاته دان، دێ خزمه‌ته‌كا گه‌له‌ك مه‌زن بيت پێشكێشى جۆتياران دهێته كرن”.
دا زانين ژى كو وان ل به‌ره به‌رى بهێنڤه‌دانا خولا په‌رله‌مانێ كوردستانێ، ئه‌و وێ قانوونێ ل ناڤ هۆلا په‌رله‌مانى گه‌نگه‌شه بكه‌ن و بزاڤێ بكه‌ن ره‌زامه‌نديێ ل سه‌ر وه‌ربگرن.
هه‌ر سوبه‌هى بڕياره دانوستاندن ل سه‌ر هه‌مواركرنا قانوونا كۆمسيۆنا كوردستانێ يا هه‌لبژارتنان بهێته كرن و دو ئه‌ندامێن دى ل سه‌ر كۆمسيۆنێ بهێنه زێده‌كرن و ديسا پرۆژه قانوونا خانه‌نشينكرنا كێم ئه‌ندامێن پێشمه‌رگه (زێره‌ڤانى هه‌رێمێ كوردستان – عيراق) بكه‌ڤيته به‌ر دانوستاندنێ ل گه‌ل راستڤه‌كرنا قانوونا راژه و خانه‌نشينا هێزێن ئاسايشا ناڤخۆ.
