سوبه‌هى په‌رله‌مانێ كوردستانێ دێ روونيت
ئه‌ڤرۆ نيوز:
بڕياره سوبه‌هى په‌رله‌مانێ كوردستانێ روونشتنا خوه يا ئاسايى يا ژماره 11 ل خولا هاڤينێ يا سالا دويێ ئه‌نجام بده‌ت و دانوستاندنێ ل سه‌ر چه‌ندين پرۆژان كه‌ت و ئه‌ندامێن لژنا ئاماده‌كرنا دستوورى ژى هه‌لبژێريت.
جێگرا سه‌رۆكا فراكسيۆنا پارتى ديموكراتى كوردستان بۆ ئه‌ڤرۆ نيوز دياركر كو بڕياره سوبه‌هى رۆژا چارشه‌مبى رێكه‌فتى 20ى گۆلانا 2015ێ په‌رله‌مانێ كوردستانێ روونشتنا خوه يا ژماره 11 ژ خۆلا بهارێ يا سالا دويێ ب ئاماده‌بوونا پتريا ئه‌ندامێن په‌رله‌مانى ئه‌نجام بده‌ت.
ئامينا زكرى، جێگرا سه‌رۆكا فراكسيۆنا پارتى ديموكراتى كوردستان، گۆت: “به‌رمانێ سوبه‌هى دێ گه‌له‌ك برگان ب خوه ڤه گريت و ژ وان ژى هه‌لبژارتنا ئه‌ندامێن لژنا ئاماده‌كرنا پرۆژێ دستوورێ كوردستانێ – عيراق بۆ راپرسيێ”.
زێده‌تر گۆت: “دێ دانوستاندنێ ژى ل سه‌ر پرۆژێ قانوونا راستڤه‌كرنا قانوونا بارێ كه‌سى يێ ژماره 188 يێ سالا 1959ێ، ب گۆره‌يى مادێن 72 و 74 و 75 ژ په‌يره‌وێ ناڤخۆ يێ په‌رله‌مانێ كوردستانێ يێ ژماره 1 يێ سالا 1992 يێ راستڤه‌كرى.
دا زانين ژى كو دێ خواندنا ئێكێ چه‌ند پرۆژێن بڕيار و قانوونێن جودا كه‌ت ب گۆره‌يى ماددێ 71 ژ يه‌پره‌وێ ناڤخۆ يێ په‌رله‌مانێ كوردستانێ يێ ژماره 1 يێ سالا 1992 يێ راستڤه‌كرى هێته كرن و گۆت: “ژ گرنگترين وان پرۆژه و بڕياران پرۆژێ قانوونا پێداچوون و رێكخستنا خانه‌نشينا مه‌ده‌نى و له‌شكرى و پرۆژێ دابينكرنا يه‌كێن بنه‌جهكرنێ بۆ ئه‌و پێشمه‌رگێن ل شه‌رێ دژى تيرۆرستێن داعش شه‌هيد بووين و چو يه‌كێن بنه‌جهكرنێ نينن”.
