سوبەھی فلمه فیستەڤالا دھۆک 3 دێ دەستپێکەت
ئه‌ڤرۆ نيوز:
سێیەم فلمە فیستەڤالا دھۆک یا نێڤدەولەتی، سوبەھی ٩/٩ ل دەمژمێر شەشی ئێڤاری ب پشکداریا ٤٠ وەلاتان و ب مێھڤانداریا چەندین سینەماکارێن ناڤدارێن بیانی و ناڤخوەیی و ھژمارەکا مەزن ژ سینەماکار و ھونەرمەند و ھونەر دوستان دێ ل ھولا کۆنگرەیان ل زانکۆیا دھۆکێ دەست پێکەت و ھەتا ١٦ ی ڤێ مەھێ دێ یا بەردەوام بیت و فلم دێ ل ھولا کۆنگرەیان و ھەر سێ ھولێن سینەمایی یێن مازی مۆل ھێنە نیشادان و فیستەڤال ب بەرھەمێ پارێزگەھا دھۆکێ فلمێ (بیرەوەریێن ل سەر بەری) یێ دەرھێنەرێ کورد (شەوکەت ئەمین) دێ ھێتە ڤەکرن.
بینا قەرەداغی، بەرپرسا فلمێن کوردی ل فلمە فیستەڤالا دھۆک بۆ ئەڤرۆ دیار کر کو فلمە فیستەڤالا دھۆک گرنگیەکا مەزن یا ل کوردستانێ ھەیی، ب تایبەتی ل پارێزگەھا دھۆکێ، چونکو فلمە فیستەڤال یا بۆ یە تشتەکێ کلتۆری ل پارێزگەھا دھۆکێ و ب دیتنا من نوکە دھۆک پایتەختێ سینەمایێ یە ل ھەرێما کوردستانێ و گۆت: ل دەف مە نە یا گرنگە دھۆک ب شێوەیەکێ فەرمی ببیتە پایتەختێ سینەمایێ، چونکو کار وێ بڕیارێ ددەت.
ھەروەسا ناڤھاتیێ گۆت: ھەکە فلمە فیستەڤال ئەڤ سالە ژی نەھاتبا گێران دا ڤالاھیەکا مەزن پەیدا بیت، چونکو پشتی ئەڤ کاودانە ب سەر مللەتێ مەدا ھاتین خەلک پێدڤی تشتەکێ بڤی ڕەنگی یە.
ھونەرمەند و رۆژنامەڤان، محەمەد عەلی ئەترووشی بۆ ئەڤرۆ گۆت: پارێزگەھا دھۆکێ پێدڤی ب گەلەک پشتەڤانیێ یە و فلمە فیستەڤالا دھۆکێ دێ پتر دھۆکێ دەتە نیاسین و باوەریی د ناڤ خەلکی دا پڕ کەت، چونکو خەلک ژ چەندین وەلاتێن بیانی تێدا پشکدار دبن.
مەسعود عارف، رێڤەبەرێ سێیەم فلمە فیستەڤالێ بۆ ئەڤرۆ ئاشکرا کر، کو چەک ب تنێ تێرا شەرێ دژی داعش ناکەت بەلکو پێدڤیە ئەم شەرێ کلتۆری و رەوشەنبیری و ھونەری ژی ل گەل ڤان تیرۆرستان بکەین دا ئەڤ جڤاکە بشێت ل سەر پێت خوە بمینیت، چونکو ئەڤ فلمە فیستەڤالە یا ھەر چار پارچێن کوردستانێ یە.
