سونە داخوازا ھێزەکا نێڤدەولەتی بۆ پاراستنا خوە دکەن
ئەڤرۆ نیوز:
ھەڤپەیمانیا ھێزێن عیراقی یا سونی، داخوازا ھێزەکا نێڤدەولەتی دکەت بۆ پاراستنا سونەیێن پارێزگەھا دیالا.
د بەیاننامەکێ دا، ھەڤپەیمانیا ھێزێن عیراقی یا سونی کو لیستەکا سیاسی یە د جڤاتا نوونەرێن عیراقێ دا، راگەھاند” میلیشیێن حەشد شەعبی یێن شیعی د بەردەوامن د تاوانێن خوەدا دژی وەلاتیێن سونە ل پارێزگەھا دیالا”.
وێ لیستا سیاسی یا سونەیێن عیراقێ د بەیانناما خوەدا، ئاماژێ ب وێ چەندێ دکەت کو حوکمەتا عیراقێ لێپرسینێ ل گەل تاوانبارێن حەشد شەعبی ناکەت، کو ل پارێزگەھێن سەلاحەدین، دیالا ، ئەنبار و بابل تاوانان دژی وەلاتیێن سونە مەزھەب ئەنجام ددەن”.
روودانا پەقاندنا چار مزگەفتان و تیرۆرکرنا ھژمارەکا وەلاتیێن باژێرێ میقدادیە ل پارێزگەھا دیالا، وێ بەیاننامێ ، ب نموونا دەست درێژیا میلیشیێن شیعی ئینا، زێدەباری ڕەڤاندنا وەلاتیێن سونە و کوشتنا وان و ھاڤێتنا تەرمێن وان ل باژێرێ بەغدا.
ھەڤپەیمانیا ھێزێن عیراقی کو نوونەراتیا پشکەکا مەزن یا سونەیێن عیراقێ دکەت، داخوازا ەلوەشاندنا میلیشیێن حەشد شەعبی دکەت کو ب فەتوایەکا مەرجەعی بلند یێ شیعی (عەلی سیستانی) ھاتیە دامەزراندن پشتی شکەستنا لەشکرێ عیراقێ ل مووسل و سەلاحەدین و داگیرکرنا وان ھەردو دەڤەران ژلایێ تیرۆرستێن داعشێ ڤە.
لیستا ناڤبری د بەیاننامێ دا، داخواز ژ ھنارتیێ نەتەوێن ئێکگرتی ل عیراقێ کر، ھێزەکا نێڤدەولەتی بۆ پاراستنا سونەیێن عیراقێ و ب تایبەتی سونەیێن پارێزگەھا دیالا بۆ وێ دەڤەرێ بھێتە ھنارتن.
