سووریا: ئەمریکا کوردان ل سووریێ بۆ بەرژەوەندیێن خوە بکار دھینیت
ئه‌ڤرۆ نيوز:
وەزیرێ دەرڤە یێ سووریێ ل سەر رەوشا رۆژئاڤایێ کوردستانێ و باکورێ سووریێ راگەھاند کو وەکو دەولەت چو سیاسەتەکا وان ل دژی کوردان نینە و کورد وەلاتیێن سووریێ نە و گۆت: (ئەمریکا دخوازیت کوردان ھان بدەت کو ژ سووریێ جودا ببن و ئەو یەک گەلەک مەترسیدارە و ھەکە کورد گوە بدەنە ئەمریکا و سیاسەتا جودابوونێ بدەنە پێشیا خوە ئەم دێ رێکێن دژوار ل ھەمبەر کوردان بکار ئینین و بەرپرسیاریا ڤێ یەکێ ژی دێ بکەڤیتە ستویێ ئەمریکا و کوردان).
ناڤبری راگەھاند ژی کو ئەمریکا بێی رازیبوونا وان ھاتیە سووریێ و بنگەھێن سەربازی دروست کریە و کەسێ داخوازا ھاریکاریێ ژ ئەمریکا نەکریە و گۆت: (ئەز دخوازم کورد ھشیار بن چونکو ئەمریکا گەلەک جاران کورد ب تنێ ھێلاینە و ئەو بۆ بەرژەوەندیێن خوە بکار ئیناینە و دڤێت کورد وانان ژ ڤێ یەکێ وەربگرن و بەرێ خوە بدەنە سووریێ، چونکو ئەڤ سووریا وەلاتێ کوردانە ژی و رێیا چارەکرنا پرسگرێکان ل شامێ یە).
وەزیرێ دەرڤە یێ سووریێ د داویا داخویانیا خوە دا ل سەر ھەبوونا ھێزێن روسیا و ئیرانێ ژی راوەستیا و راگەھاند کو ھەم ئیران و ھەم ژی روسیا ل سەر داخوازا حوکمەتا وان ب فەرمی ھاتینە سووریێ و گۆت: (روسیا د شەرێ ل دژی تیرۆرێ دا ل سەر داخوازا مە ھاتیە ھەرێمێ و ھەڤکاریا مە دکەت و رۆلەکا وێ یا گرنگ د ژناڤبرنا تیرۆرستان دا یا ھەی).
