سووریێ سوپاسیا سەرۆک بارزانی دکەت
سکرتێرێ گشتی یێ پارتی دیموکراتی کوردستان/ سووریێ راگەهاند، بەری دو رۆژان وان سەرەدانا سەرۆک بارزانی کرینە و د سەرەدانێ دا سەرۆک بارزانی پشتەڤانیا خوە بۆ رۆژئاڤایێ کوردستانێ دیار کریە و داخواز کریە کورد ل سووریێ پێکڤە کار بکەن دا بگەهنە مافێن خوە، وەکو پارتی دیموکراتی کوردستان/ سووریێ ئەو سوپاسیا سەرۆک بارزانی دکەن.
محەمەد ئیسماعیل سکرتێرێ گشتی یێ پارتی دیموکراتی کوردستان/ سووریێ د داخۆیانیەکێ دا بۆ دەزگەهێن راگەهاندنێ دیار کر، بەری دو رۆژان وەکو شاندەک ژ پارتی دیموکراتی کوردستان/ سووریێ وان سەرەدانا سەرۆک بارزانی کرینە، سەرۆک بارزانی پشتەڤانیا خوە بۆ مافێن رەوا یێن گەلێ کورد ل سووریێ دیار کریە، سەرۆک بارزانی داخواز کریە هەموو هێز و ئالیێن سیاسی یێن کوردی ل رۆژئاڤایێ کوردستانێ پێکڤە کار بکەن، ژ بەر هندێ ژی ئەو وەکو پارتی دیموکراتی کوردستان/ سووریێ سوپاسیا سەرۆک بارزانی دکەن.
ناڤهاتی سەبارەت ب رەوشا دووماهیێ یا ل رۆژئاڤایێ کوردستانێ و سووریێ ژی ئاخڤی و دیار کر، سووریێ بەر ب گوهۆڕینێن مەزن ڤە دچیت، بێگومان مە دڤێت هەموو هێزێن کوردستانی ل رۆژئاڤایێ کوردستانێ پێکڤە کار بکەن، د کۆنگرێ ١٢ یێ پارتی دیموکراتی کوردستان/ سووریێ دا ژی بەحسێ ڤێ یەکێ هاتبوو کرن، لێ مخابن نها گەلەک ئاستەنگی ل هەمبەر خەباتا نەتەوی یا گەلێ کورد ل سووریێ و رۆژئاڤایێ کوردستانێ هەنە، پەیەدە و رێڤەبەریا خوەسەر هەتا نها ژی ئاستەنگیان بۆ خەباتا پارتیێن کوردستانی دروست دکەن، هەتا نها ژی هەڤالێن مە دهێنە دەستەسەرکرن، ئەو یەک ژی نیشا ددەت رەوشا نها یا ل رۆژئاڤایێ کوردستانێ باش نینە، مە وەکو پارتی دیموکراتی کوردستان/ سووریا بەری نها چەندین جاران دیار کریە، دڤێت کورد پێکڤە کار بکەن و دڤێت چو ئاستەنگی نەمینن، لێ مخابن هەتا پەیەدە و رێڤەبەریا خوەسەر هەلوەستێ خوە ل هەمبەر خەلکێ مە ل رۆژئاڤایێ کوردستانێ نەگوهۆڕن دێ رەوشا خراب بەردەوام بیت، لێ بزاڤێن مە ژی د بەردەوامن و مە دڤێت دەست ب قۆناغەکا نوو ل رۆژئاڤایێ کوردستانێ بکەین.
محەمەد ئیسماعیل ئەو یەک ژی نەڤەشارت کو بەری نها ژی سەرۆک بارزانی گەلەک بزاڤ کرن دا ئاریشێن هەی د ناڤبەرا مە و پەیەدێ دا بهێنە چارەسەرکرن، ژ بۆ هندێ ژی چەندین رێککەفتن هاتنە ئیمزا کرن، لێ پەیەدێ پێگیری ب رێککەفتنان نەکر و ژ بەر هندێ ژی رەوشا رۆژئاڤایێ کوردستانێ نها گەلەک خرابە، خەلک ژ سیاسەتا نها یا پەیەدێ رازی نینن و ژ بەر هندێ ژی ئەم دبێژین هەتا ل گۆر راستیا نها ل رۆژئاڤایێ کوردستانێ کار نەهێنە کرن و رێز ل داخوازیێن خەلکێ مە نەهێتە گرتن دێ ئالۆزیێن هەی بەردەوام بن و ئەو یەک د بەرژەوەندیا گەلێ مە دا نینە.
