سیپان شێروانی: 100 پەرلەمانتارێن ئیراقی بندیوارن
ئەندامەكێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان راگەهاند: 100 ئەندامێن جڤاتا نوونەرێن ئیراقێ بندیوارن و گەلەك كێم پشكداریێ د روونشتنێن جڤاتا نوونەراندا دكەن، ئەڤێ چەندێ ژی وەكریە كو پترییا جاران رێژەیا قانوونی تمام نەبیت.
ل شەڤا سێشەمبی 25 ئادارا 2025، ژ ئەگەرێ تمامنەبوونا رێژەیا قانوونی، روونشتنا جڤاتا نوونەرێن ئیراقێ بۆ دەنگدانێ ب پڕۆژەیێ پارێزگەهبوونا هەلەبجە بۆ رۆژا د دووڤدا بهێتە پاشئێخستن.
سیپان شێروانی، ئەندامێ جڤاتا نوونەرێن ئیراقێ ژ فراكسیۆنا پارتی دیموركراتی كوردستان گۆت» ئەگەرێ تمامنەبوونا رێژەیا قانوونی یا روونشتنا جڤاتا نوونەرێن ئیراقێ، یاریا تەپا پێ بوو د ناڤبەرا هەردو هەلبژارتیێن ئیراقێ و فلستینێ، چونكە پشكەك ژ پەرلەمانتاران ل كافیتیرییا جڤاتا نوونەران ل بەر یاریێ بوون و بەرهەڤ نەبوون بچنە د ناڤ هۆلا روونشتنا جڤاتا نوونەراندا».
ل دووڤ ئاخڤتنا وی ئەندامێ فراكسیۆنا پارتی دیموكراتی كوردستان ل جڤاتا نوونەرێن ئیراقێ» د دەمێ سێ سال و نیڤێن بۆریدا، جڤاتا نوونەرێن ئیراقێ نێزیكی 100 ئەندامێن بندیوار هەبوون. هەرچەندە سەرجەمێ گشتیێ هەژمارا پەرلەمانتاران 329 كەسە، بەلێ تنێ ل چەند حالەتێن كێمدا رێژیەا قانوونی یا بەرهەڤبوویان گەهشتییە 200 كەسان، پترییا جاران تنێ 170 بۆ 180 پەرلەمانتار بەرهەڤی روونشتنان دبن، پێشتر ژی فوئاد حسێن وەزیرێ دەرڤەیێ ئیراقێ د داخۆیانییەكا رۆژنامەڤانیدا ئەڤ چەند پشتڕاستكریە».
سیپان شێروانی د پشكەكا دی یا ئاخڤتنێن خوە دا ئەوژی بەرچاڤكر» ناڤێ بندیوار دكەڤیتە وان 100 پەرلەمانتاران، چونكە دەمەكی د روونشتنێن جڤاتا نوونەراندا گەنگەشە ل سەر پڕۆژە قانوونەكا گەلەك گرنگ دهێتە كرن یان دەنگ ل سەر دهێتە دان، ئەو ل مالێن خوە د پالداینە و هەتاكو ب رێكا تەلەڤزیۆنێ ژی ناسەحكەنە روونشتنێن جڤاتا نوونەران. ئەركێ سەرەكیێ خوە كو قانوندانان و چاڤدێرییا كاروبارێن حوكمەتێیە، بجهنائینن و نوونەرایەتییا راستەقینەیا خەلكی ناكەن».
