سێ تاوانبار هاتنه ده‌سته‌سه‌ركرن
ئەڤرۆ نيوز، نیوار:
نڤیسینگەھا خەبات یا نەھێلانا گۆنەھباریان ل دھۆکێ شیان سێ تاوانباران دەستەسەرکەن کو پشتی دانپێدان ب تاوانێن خوە کرین ئاشکەرا بوویە کو 12 مال شەلاندینە.
رائیدێ مافپەروەر، ھێمن سلێمان، بەرپرسێ پەیوەندی و راگەھاندنێ ل رێڤەبەریا پۆلیسێن پارێزگەھا دھۆکێ بۆ ئەڤرۆ نيوز گۆت: “پشتی ژمارەکا وەلاتیان ل تاخێن شندوخا و نزارکێ و ئێتووتێ سەرەدانا نڤیسینگەھا خەبات یا نەھێلانا گۆنەھباریان کری و وەسان دیارکری کو خانیێن وان یێن ھاتینە شەلاندن، ئێکسەر پۆلیسێن نەھێلانا گۆنەھباریان خەبات دەست ب ڤەکۆلین و دووڤچوونا بابەتی کر”.
بەرپرسێ پەیوەندی و راگەھاندنێ ل رێڤەبەریا پۆلیسێن پارێزگەھا دھۆکێ زێدەت گۆت: “بۆ ڤێ مەرەمێ ژی شیان سێ تاوانباران دەستەسەر بکەن، ڤان ھەرسێ تاوانباران دانپێدان ب تاوانا خوە کرن کو 12 مال شەلاند بوون”.
رائیدێ مافپەروەر ئاشکەرا ژی کر کو پۆلیسێن بنگەھێ خەبات ل گەل دەستەسەرکرنا ڤان دزیکەران شیان کۆژمەکێ مەزن یێ زێران کو یێ وان خێزانان بوو یێن دزی ژێ ھاتینە کرن بۆ ب ڤەگەرینن، “بەلێ دیار بوو ئەو پارە ژ لایێ وان کەسان ڤە ھاتبوو مەزاختن”.
بەرپرسێ پەیوەندی و راگەھاندنێ ل رێڤەبەریا پۆلیسێن پارێزگەھا دھۆکێ ل دووماھیێ ژی گۆت: “ھەرسێ تاوانباران دانپێدان ب تاوانا خوە کریە و بۆ دادگەھێ ھاتینە رەوانە کرن”.
