سێ كه‌س ب تۆمه‌تا رێكخستنا خوه‌نيشاندانێن نه‌يێن قانوونى هاتينه ده‌سته‌سه‌ركرن
ئه‌ڤرۆ نيوز، نيوار محه‌مه‌د سه‌ليم:
رێڤه‌به‌ريا پۆليسێن پارێزگه‌ها دهۆكێ راگه‌هاند كو سێ كه‌س ل دهۆكێ ب تۆمه‌تا خوه‌نيشاندانێن نه‌يێن قانوونى و بێ ده‌ستوورى ب بڕيارا دادوه‌رێ ڤه‌كۆلينێ هاتينه ده‌سته‌سه‌ركرن.
رائيدێ مافپه‌روه‌ر، هێمن سلێمان، به‌رپرسێ په‌يوه‌ندى و راگه‌هاندنێ ل رێڤه‌به‌ريا پۆليسێن پارێزگه‌ها دهۆكێ بۆ ئه‌ڤرۆ نيوز گۆت: “ل رۆژا 26ى گۆلانا 2018ێ كه‌سه‌ك ب ناڤێ مسته‌فا سه‌يدق سالح، ب بڕيارا دادگه‌ها ڤه‌كۆلينێ هاتيه ده‌سته‌سه‌ركرن ب تۆمه‌تا هاندانا وه‌لاتيان بۆ رێكخستنا خوه‌نيشاندانێن نه‌يێن قانوونى كو ل دووڤ قانوونێ ئه‌ڤه دبيته تاوان، چونكو گه‌له‌ك جاران ئه‌ڤ خوه‌نيشاندانه به‌ر ب رێيێن نه‌ديار ڤه دچن و زيانێ دگه‌هيننه جهێن حكومى يان ژى گشتى و وه‌لاتيان و كاودانێن ئێمناهيێ”.
زێده‌تر گۆت: “هه‌رديسان دو كه‌سێن دژى ل تۆمه‌تا رێكخستنا خوه‌نيشاندانێن شوفێرێن ته‌كسيان هاتينه ده‌سته‌سه‌ركرن و ئه‌و ژى ب هه‌مان مه‌ره‌م هاتينه ده‌سته‌سه‌ركرن”.
ل هه‌رێما كوردستانێ ب گۆره‌ى قانوونا رێكخستنا خوه‌نيشاندانان ئه‌وا ژ په‌رله‌مانێ كوردستانێ ده‌ركه‌فتى، پێدڤيه به‌رى ئه‌نجامدانا خوه‌نيشاندانێ ب مه‌ره‌ما رێكخستن و دابينكرنا ئه‌منيه‌ت و جهێ پێدڤى، داخوازا ئه‌نجامدانا خوه‌نيشاندانێ ب فه‌رمى بكه‌ت و د ماوێ سێ رۆژان دا ره‌زامه‌ندى ل سه‌ر بهێته كرن.
به‌رپرسێ په‌يوه‌ندى و راگه‌هاندنێ ل رێڤه‌به‌ريا پۆليسێن پارێزگه‌ها دهۆكێ ئاشكه‌را ژى كر كو ئه‌ڤان سێ كه‌سان بێ كو چو پێنگاڤێن قانوونى ب هاڤێژن، هاندانا وه‌لاتيان كريه ژ بۆ رێكخستنا خوه‌نيشاندانێن نه‌يێن قانوونى و نوكه ب بڕيارا دادوه‌رێ ڤه‌كۆلينێ د ده‌سته‌سه‌ركرينه و ل بن ڤه‌كۆلينێ نه.زز