سێ كورد دناڤ ليستێن عه‌ره‌بى دا دێ خوه بۆ هه‌لبژارتنێن عيراقێ به‌ربژاركه‌ن
ئه‌ڤرۆنيوز:
ل دووڤ وان پێزانينێن ئه‌ڤرۆنيوز ب ده‌ستخوه‌ڤه خستين، هه‌تا نوكه دياربوويه كو سێ كورد دێ دناڤ ليستێن عه‌ره‌بى دا خوه بۆ جڤاتا نوونه‌رێن عيراقێ به‌ربژار كه‌ن.
هه‌ر ئێك ژ سروه عه‌بدولواحد وئالا تاله‌بانى وئاراس حه‌بيب محه‌مه‌د كه‌ريم دێ دناڤ ليستێن عه‌ره‌بى خوه بۆ جڤاتا نوونه‌ران به‌ربژار كه‌ن.
سروه عه‌بدولواحد، سه‌رۆكا فراكسيۆنا بزاڤا گۆران ل جڤاتا نوونه‌رێن عيراقێ راگه‌هاندبوو كو دێ دناڤ ليستا (النصر) ب سه‌رۆكاتيا حه‌يده‌ر عه‌بادى خوه به‌ربژاركه‌ت، دهه‌مان ده‌م دا ئاراس حه‌بيب محه‌مه‌د كه‌ريم سه‌رۆكێ كۆنگرێ نيشتمانى يێ عيراقى دێ خوه دناڤ هه‌مان ليستا عه‌بادى دا خوه به‌ربژاركه‌ت.
ژئاليه‌كى دى ڤه، دهێته به‌حسكرن كو ئالا تاله‌بانى ئه‌نداما فراكسيۆنا ئێكه‌تى نيشتمانى كوردستان ل جڤاتا نوونه‌ران دێ خوه ل سه‌ر ليستا (الحل) ب سه‌رۆكاتيا جه‌مال كه‌ربولى خوه به‌ربژاركه‌ت، دهيته گۆتن ژى كو ل سه‌ر ليستا عه‌بادى خوه به‌ربژاركريه، به‌لێ ئه‌ڤ چه‌نده هه‌تا نوكه نه‌هاتيه پشت راستكرن.
سروە عەبدولواحد، ئه‌نداما جڤاتا نوونه‌ران ژ بزاڤا گۆران، كو نوكه ئيك ژ به‌ربژارێن عه‌بادى يه ل باژێرێ به‌غدا، راگه‌هاندبوو كو ل سه‌ر بريارا بزاڤا گۆران وێ ئه‌و كاره كريه وبه‌رى نوكه وێ بزاڤا گۆران ب ڤێ بريارێ ئاگه‌هداركربوو وده‌ست ژكاركێشانا خوه ژى ژگۆران راگه‌هاند، به‌لێ رێبوار ئه‌حمه‌د ئه‌ندامێ جڤاتا نيشتمانى يا بزاڤا گۆران راگه‌هاند كو گۆران چو ئاخڤتنه‌ك ل دۆر وێ چه‌ندێ نه‌كريه ويا ئاگه‌هدار ژى نه‌بوو، چونكى وى بابه‌تى په‌يوه‌ندى ب فراكسيۆنا بزاڤا گۆران ڤه ل به‌غدا يا هه‌ى.
ژلايێ خوه‌ڤه محه‌مه‌د عوسمان ئه‌ندامێ جڤاتا ناڤه‌ندى يا ئێكه‌تى نيشتمانى كوردستان راگه‌هاند” هه‌ر كه‌سه‌كێ ب سه‌ر ئێكه‌تىێ ڤه خوه ل سه‌ر ليسته‌كا دى به‌ربژار بكه‌ت، ئه‌و ئێدى ب ئه‌ندامێ ئێكه‌تيێ ناهێته هژمارتن”.
