سێ وەلاتێن ئورۆپا ب توندی ھۆشداری دانە ئیرانێ
ئەڤرۆ:
وەزیرێن دەرڤە یێن ھەر سێ وەلاتێن بریتانیا، ئەلمانیا و فرەنسا کۆمبوون و پشتی کۆمبوونێ ژی د داخۆیانیەکا ھەڤپشک دا ھەر سێ وەلاتان دژبەریا خوە ل ھەمبەر بزاڤێن ئیرانێ بۆ پیتاندنا یۆرانیۆمێ دیار کرن و راگەھاند کو دڤێت ئیران ب چو رەنگەکێ کار بۆ دروستکرنا چەکێن ئەتۆمی نەکەت، چونکو ئەو یەک دێ مەترسیەکا خوە یا گەلەک مەزن بۆ رۆژھەلاتا ناڤین و ھەتا ھەموو جیھانێ ھەبیت، ب جھێ ھندێ باشترە ئیران پێگیریێ ب رێککەفتنا بەری نھا بکەت، چونکو ھەکە ئیران مەرجێن رێککەفتنێ بجە بینیت ئەمریکا ژی دێ پێنگاڤ ب پێنگاڤ سزایێن ئابووری یێن ل سەر ئیرانێ سڤک کەت.
ھەر سێ وەلاتان ب توندی ھۆشداریا ھندێ ژی دانە ئیرانێ کو ھەکە تەھران ل سەر ھەلویستێ خوە یێ نھا بەردەوام بیت ئەو ژی دێ ل گەل ئەمریکا دەست ب سزادانا ئیرانێ کەن.
پشتی داخۆیانیا ھەڤپشک یا ھەر سێ وەلاتێن ئورۆپی سەعید خەتیب زادە پەیڤدارێ وەزارەتا دەرڤە یا ئیرانێ ژی راگەھاند کو ھەلویستێ ھەر سێ وەلاتێن ئورۆپی ژ ئالیێ ئیرانێ ڤە ب چو رەنگەکێ ناھێتە قەبوولکرن و مخابن ھەلویستێ وان ژی وەکو یێ ئەمریکا یە، چونکو دڤێت وەلاتێن ئورۆپا داخواز ژ ئەمریکا بکەن کو ڤەگەریتە ڤە رێککەفتنا ئەتۆمی و دەستان ژ سزادانا ئیرانێ بەردەت، لێ ب جھێ ھندێ وەلاتێن ئورۆپا ئیرانێ تەنگاڤ دکەن و ئەو یەک ژی ناھێتە قەبوولکرن.
پەیڤدارێ وەزارەتا دەرڤە یا ئیرانێ ئەو یەک ژی دیار کر کو ھەتا نھا ھەلویستێ ئیدارا نوو یا ئەمریکا وەکو سەردەمێ ترامپی یە و ھەکە رەوش وەسا بیت ئیران بەرھەڤ نینە ل گەل ئەمریکا ل دۆر رێککەفتنا ئەتۆمی دەست ب دانوستاندنان بکەت.
ئەو یەک د دەمەکێ دایە کو حەفتیا بۆری جۆ بایدن سەرۆکێ ئەمریکا راگەھاند کو ئەو ب چو رەنگەکێ سزایێن ئابووری یێن ل سەر ئیرانێ سڤک ناکەن و دڤێت بەری ھەر تشتەکێ ئیران ھەموو مەرجێن رێککەفتنا ئەتۆمی یا سالا ٢٠١٥ بجە بینیت و دەستان ژ ئالۆزکرنا رەوشا دەڤەرێ بەردەت، ھەکە ئیران ل سەر ھەلویستێ خوە یێ نھا بەردەوام بیت ئەمریکا دێ سزایێن گرانتر ژی ل سەر ئیرانێ سەپینیت.
