سەخبێریا رێ و پرێن دهۆكێ داخوازه‌كێ ژ وه‌زاره‌تا دارایى دكه‌ت
ئەڤرۆ نیوز ، زنار تۆڤی:
ژ ئەنجامێ بارینا بارانان و چێبوونا لەهیان د ئەڤ سالە دا، زیان گەهشتیە گەلەك جادە و رێكێن سەرەكی ل سەرانسەری پارێزگەها دهۆكێ، ل گەلەك جهان ژی ئاخ رهیایە و جادە داچووینە و خراب بووینە.
دێوالی حەمێ بریندار رێڤەبەرێ سەخبێری و پاراستنا رێك و پرا ل پارێزگەها دهۆكێ بۆ رۆژناما ئەڤرۆ گۆت: ئەو رێكێن د رهیێن و نەهێنە برین، دەملدەست تیمێن مە دگەهنە وان جهان و وێ ئاخێ رادكەن و ب شێوەكێ دەمكی ئەم وان رێیان سەخبێر دكەین، ل گەل هندێ ژی ئەم ڤەدیتنان ژی بۆ وان رێیان دكەین، ژ پێخەمەت پشتی دەربازبوونا دەمێ بارانان ئەم وان رێیان چێكەین، هەروەسا د ئەڤ سالەدا ئەڤە جارا سێزدێ یە ئەم چەپێن زرێزە سەخبێر دكەین، لێ نوكە گەهشتیە رادەكێ وەسا كو دێ ژ كاركەڤیت، لەوما ئەو سەخبێر دكەین، داكو ئەو رێك نەهێتە برینێ، مە ڤەدیتن بۆ كریە و ئەم لێ دگەرین، ژ پێخەمەت ڤەگۆهاستنا وێ رێكێ بۆ جهەكێ دیتر،
دیسا ژ دووریانا شێخان بۆ خەنس جادە رهیایە، هەر چەندە مە رەنگەكێ دەمكی چارە كریە، مە ڤەدیتن بۆ كریە، هەكە پارە بۆ بهێنە تەرخانكرن، دا ب شێوەكێ دروست چێبكەین، هەروەسا رێیا بامەرنێ بۆ پاسێ ئەڤە سێ جاران رهیایە و هەكە مە چارەنەكرنا دا ئەو رێك ژی هێتە برین، هەروەسا رێیا بامەرنێ بۆ قەدشێ ژی و ل نێزیك گوندێ ئەرەدنا ل چەندین جهان جادە رهیایە، لێ ژ ئەنجامێ بارینا بارانان ئەم نەشیاینە وێ رێكێ چێكەین. ناڤهاتی گۆت ژی: ژ ئەنجامێ بارینا بارانان ب رێژەكا مەزن ئەو رێیا ژ سكرێ دهۆكێ دچیتە زاویتە، ل گەلەك جهان جادە خراب بوویە و رهیایە، مە چەندین جاران پاقژ كریە، لێ هەر خراب دبیت، دیسا رێیا چەمانكێ بۆ ئەترووشێ ژی جادە رهیایە و مە چەندین جاران چێكریە، لێ مە ڤەدیتن بۆ كریە، كو دڤێت ئەو رێیە بۆ جهەكێ دیتر بهێتە ڤەگۆهاستن،
هەروەسا چەپێن تروانشێ ژی خراب بووینە و مە ب شێوەكێ دەمكی چارەكریە، لێ دڤێت ئەو رێك ژی بهێتە ڤەگۆهاستن، دیسا چەپێن شەرانشێ ژی خراب بووینە و مە سەرەدانا وێ رێكێ كریە، كو ل گەلەك جهان داچوویە و خراب بوویە، ڤەدیتن بۆ هاتیە كرن، داكو ب رەنگەكێ ئێكجاری بهێتە چارەكرن، لەوما هە رتشتەكێ پێدڤی بیت دێ بۆ وێ رێكێ كەین، هەر دەمێ سەقا خۆش بیت، دێ دەست ب كاری كەین، هەروەسا ل گەلی كورتكی ژی رێك ل چەندین جهان هریایە، مە ڤەدیتن بۆ كریە و چەندین جاران ب شێوێ دەمكی مە كار تێدا كریە، داكو ئەو رێك نەهێتە برین.
دێوالی حەمێ زێدەتر دبێژیت: ژ ئەنجامێ گەلەك بارینا بارانان، ل بەری سیلێ ژی ل ئامێدیێ رێك خراب بوویە، مە بزاڤكریە كو ئەم وێ رێكێ ژی چێكەین، هەروەسا رێیا نێڤدەولەتی ژ سێمێلێ هەتاكو دگەهیتە ئالۆكا و فەیدیێ و بەدریكێ و دووریانا باعەدرێ، كو نێزیكە ئەڤ جادە دێ ژ كاركەڤیت، هەر چەندە سالانە مە سەخبێریا سڤك بۆ كریە، لێ نوكە ڤێ جادێ پێدڤی ب تەخەكا ئەسفەلتی هەی، ئەم ل هیڤیا مەزاختنا پارەی ماینە، هەروەسا رێیا بەردەرەش بۆ كەلەك یا ژ كاركەفتی، نوكە گۆژمەكێ پاران بۆ هاتیە تەرخانكرن، لێ ئەو پارە تێرا 20% ناكەت، هەر دەمێ بارینا بارانا ب دووماهی بهێت دێ كار تێدا كەین.
هەروەسا ئەو رێیا ژ چرەی دچیتە رووڤیا پێدڤی ب سەخبێركرنێ یە، مە ڤەدیتن بۆ كریە، ژ پیچخەمەت ئەو رێك بۆ هانوچوونێ بهێنە خۆشكرن، لەوما ئەم دخوازین كو جهێن شۆلەژێ و ب تایبەتی وەزارەتا دارایی ب چاڤەكێ بەرفرەهتر بەرێ خوە بدەتە پارێزگەها دهۆكێ، گۆژمێ پێدڤی بۆ ریكێن دهۆكێ تەرخان بكەت، ژ پێخەمەت ئەم بشێین ئەڤان هەموو جادە و رێیان سەخبێر بكەین، بشێن باشتر خزمەتا خەلكێ خوە بكەین هەر چەندە چەندین رێكێن دیتر ژی پێدڤی ب سەخبێركرنێ هەنە.
