سەدامی ژ سەرێ چیایێ شنگالێ مۆشەک ددانانە ئیسرائیلێ
ئه‌ڤرۆ نيوز:
گەلەک و گەلەک بەحسێ وان مۆشەکان دھێتە کرن یێن سەدامی ل سالا ١٩٩١ێ ھاڤێتینە ئیسرائیلێ و بەلگەنامەیان دووپاتکریە کو ھژمارا وان مۆشەکان ٤٣ مۆشەک بوون سەدامی د ئیسرائیل وەرکرین و ھەموو ژ چیایێ شنگالێ ھاتینە ھاڤێتن کو دھێتە ھژمارتن نێزیکترین خالا عیراقێ بۆ ئیسرائیل.
گەلەک کەس ژی بەحسێ ئەگەرێ ھندێ دکەن کا بۆچی سەدامی مۆشەک ددانانە ئیسرائیلێ، د سەر وێ یەکێ را ئەو شەرێ ب سەر عیراقێ دا ھاتی ئیسرائیل نە شەرکارا سەرەکی بوو، ھەروەسا ئەڤە بۆ ئێکەک جارە دەزگەھەکێ راگەھاندنێ ئاشکرا دکەت کا سەدامی ژ چو جە مۆشەک ددانانە ئیسرائیلێ کو ئەو ژی ژ سەرێ چیایێ شنگال بوویە.
فەرماندەکێ پێشمەرگەی: چیایێ شنگال بلندترین و نێزیکترین خالا عیراقێ یە بۆ ئیسرائیل
ھندەک دیدەڤان ھوسا ئاشکرا دکەن کو سەدامی سەرێ چیایێ (چل مێرا) بۆ خوە تەرخانکربوو مۆشەکا بدانیتە ئیسرائیل و وان ب چاڤێ خوە دیتیە دەمێ مۆشەک دچوونە ئیسرائیل، چونکو دەمێ مۆشەک دچوون و پشتی چەند دەمژمێران، رادیویا دەنگێ ئەمریکا و مونتیکارلو دگۆت ھندەک مۆشەک ب ئیسرائیلێ کەفتن و سەدام ژێ بەرپرسیار دکر و ل ھەمان دەم ژی رژێما عیراقێ دانپێدان ب وێ یەکێ دکر.
چیایێ شنگال وەکو چو چیایێن دی نینە، چونکو دھێتە ھژمارتن چیایەکێ دیرۆکی و پتریا دیرۆکا شنگال ل سەر ھاتیە تومارکرن و گەلەک روودان ل سەر چیای ھاتینە تومارکرن، ھەر دکەڤن دا بەری ئیمراتۆریەتا رۆمانی دۆرێن ٧٢ فەرمانێن ئۆسمانی ب سەر کوردێن ئێزدی دا ھاتینە خوار و پتریا وان ل سەر چیایێ شنگال بووینە و گەلەک جاران مەسحی و ئەرمەن ژ فەرمانا رەڤینە و بەرەڤ چیایێ شنگال ھاتینە بۆ خوە پاراستنێ ژ ھێرشێن دوژمنان، ھەروەسا خوە ژ سالێن حەفتێیان سەدامی ژی ئەو جھە بۆ خۆ کربوو جھەکێ تایبەت بۆ شەری ل گەل وەلاتێن دەوروبەر.
چیایێ شنگال دکەڤیتە باشوورێ رۆژئاڤایێ ھەرێما کوردستانێ، درێژیا وی ٧٧ کیلومەترن و ل سەر سنوورێ کوردستانا سوریا تمام دبیت و پانیا وی ١٣ کیلومەترن و رێیا وێ ب ١٤٧٠ مەتران ھەتا دگەھیتە سەرێ (چل مێرا)، ناڤێ وی ژ چل زەلامان ھاتیە کو ژ میتۆلوجیایا ئێزدیان ھاتیە وەرگرتن و ئەڤە ناڤێ مەزارەکێ پیرۆزێ ئێزدیانە و رۆژانە ب دەھان خێزانێن ئێزدی سەرەدانا وی مەزاری دکەن، بەلێ ل دەمێ رژێما سەدامی ل دەڤەرێ، دەلیڤە نەددا کوردێن ئێزدی سەرەدانا چیای و مەزاری بکەن.
لیوا سالا جەباری، ئێک ژ سەرکردێن لەشکەرێ پێشمەرگەیێن کوردستانێ بۆ ئەڤرۆ دیار کر، چونکو سەرێ چیایێ چل مێرا دھێتە ھژمارتن بلندترین و نێزیکترین خالا عیراقێ بۆ ئیسرائیل، لەوما سەدامی ئەو چیایی بۆ دانانا مۆشەکان ھەلبژارت بوو و گۆت: ڤێ ژی مەبەستەک سیاسی تێدا بوو، چونکو سەدامی دزانی ژ چو جە ئەو مۆشەکا بدانیتە ئیسرائیلێ، دێ فرۆکە و مۆشەکێن ھەڤپەیمانیێ مۆشەکێن وی پەقینن و ناھێلن بگەھنە ئیسرائیل، ھەروەسا سەدامی دزانی خەلکێ شنگال ھەموو کوردن، لەوما وی دڤیا وێ دەڤەرێ تووشی کارەساتێ بکەت و ئیسرائیل وان ھەموویان بکوژیت و ڤێ ژی سەرگرت و ھژمارەکا مەزن ژ خەلکێ شنگال و گوندێن دەوروبەر بوونە قوربانی ھێرشێن ھەڤپەیمانیا نێڤدەولەتی.
د ڤێ دەربارێ دا قاسم شنگالی وەکو دیدەڤان ل سەر وان مۆشەکێن سەدامی ھاڤێتینە ئیسرائیل کو ئە ڤسالە ل ئێک ژ وەلاتێن ئەورۆپی ڤەگەریایە ھەرێمێ بۆ ئەڤرۆ دیار کر (شەڤەکێ من کاروانەکێ ترومبێلێن بارھەلگرێن مەدەنی و سەربازی دیتن و کەل و پەلێن گران ڤێ بوون و بەرەڤ چیایێ چل مێرا یێ شنگال ب سەردکەفتن، پشتی چەند رۆژەکا و شەر دەستپێکری، شەڤەکا شواتێ من ئاگەە لێ بوو خانیێن مە یێ د لەرزن و ل گەل ھندێ ژی دەنگەکێ گەلەک بلند ژ ئاسمانی دھات.
ژ ئالەکێ دی ڤە فەقیر ناسر خدر خەلەف وەکو دیدەڤان ل سەر وان بۆمبان بۆ ئەڤرۆ دیار کر، بەری دەستپێکرنا شەرێ کوێت و لێدانا عیراقێ ب دو ھەیڤان، ھەموو خەلکێ شنگالێ دیت کو رۆژانە ترومبێلێن بارھەلگر بەرەڤ چیایێ چل مێرا ب سەردکەفتن، مە نەدزانی بارێ وان مۆشەک بوون و دێ وی چیای کەنە پەرژانێ بەرەڤانیکرنێ و دانانا مۆشەکان، بەلێ مە گومان ل سەر ھەبوو و گۆت: ھەتا دەست ب ھاڤێتنی کر مە ژ نوو زانی یێ مۆشەکان دداننە ئیسرائیل و ب شەڤ ھەموو گوندێن شنگال د روون بوون و ژ بەر دەنگێ وان کەس نەدشیا بنڤیت.
ريساله شه‌رگاتى بۆ رۆژناما ئه‌ڤرۆ به‌رهه‌ڤكريه:
