سەدر بزاڤا لاوازکرنا مەرجەعیەتا شیعی یا ئیرانی دکەت
ئەڤرۆ نیوز:
موقتەدا سەدر کارتێکرنەکا مەزن ل سەر مەیدانا سیاسی یا عیراقێ یا ھەی، ب تایبەتی د ھەلبژارتنێن ئێکێ دا ل عیراقێ پشتی 2003 ێ، شیا 40 کورسیان د پەرلەمانی دا ب دەستخوەڤە بینیت و ل ڤێ دووماھیێ ژی بزاڤ و لڤینێن وی ھژیانەک ل پرۆسا سیاسی ل عیراقێ دروستکر ب تایبەتی پرسا خوەنیشادانان و چوونا خوەنیشاندەران بۆ ناڤ پەرلەمانێ عیراقێ و ئۆفیسا سەرۆک وەزیرێن عیراقێ، بەری چەند رۆژان ژی موقتەدا سەدر جارەکادی مەیدانا سیاسی ل عیراقێ شلقاند دەمێ د دیدارەکێ دا ل گەل کەنالێ (الشرقیە) رەخنێن دژوار ل ئیرانێ گرتین و تومەتبارکری ب ھنارتنا خوەکوژان بۆ ناڤ عیراقێ، ئەندامەکێ پەرلەمانێ عیراقێ ژ لیستا پارتی دیموکراتی کوردستان ئاماژێ ب ھەڤڕکیەکا دژوار ددەت دناڤبەرا مەرجەعێن شیعی یێن عەرەبی و عیراقی ب سەرۆکاتیا موقتەدا سەدر و مەرجەعێن شیعی یێ ئیرانی ب سەرۆکاتیا سیستانی و ب پشتەڤانیا ئیرانێ.
د. عەرەفات کەرەم ئەندامێ پەرلەمانێ عیراقێ ژ لیستا پارتی بۆ رۆژناما ئەڤرۆ دبێژیت”ھندەک شرۆڤەکار، ئیرانێ ب کوشتنا بابێ موقتەدای، مەرجەعێ شیعی ( محەمەد باقر سەدر) ل گەل ھەردو برایێن وی ( موستەفا و موئەمەل) ل سالا 1999 ێ ل نەجەفێ تومەتباردکەن و دبێژن مەرەما ئیرانێ ژ وێ چەندێ نەھێلانا مەرجەعیەتا عەرەبی بوو بۆ شیعان و مەرجەعیەتا فارسی جھێ وێ بگریت و بارەگایێ مەرجەعیەتا شیعی ژ نەجەفێ بۆ باژێرێ ( قوم) یێ ئیرانی بھێتە ڤەگوھاستن”.
ل دووڤ بۆچوونا د. عەرەفات کەرەم، مەرجەعێن عەرەبی و عیراقی کو سەدر ژوان دھێتە ھژمارتن دخوازن رۆلێ ئیرانی یێ ئایدیولۆژی و سیاسی ل عیراقێ لاواز بکەن، بەلێ ئەڤ بزاڤە گەلەک یا ب زەحمەت و مەترسیدارە و پێدڤی ب ھاندانەکا جەماوەری یا مەزنە و رەوش ل عیراقێ یا بەر ب ڤێ چەندێ دچیت، ژبەر کو بەری نوکە مە بەحسێ ھەڤڕکیا شیعی سونی دکر، بەلێ نوکە ئەم یێ بەحسێ ھەڤڕکیا شیعی شیعی دکەین، ب تایبەتی د چارچۆڤێ لیستا ھەڤپەیمانیا نیشتمانی یا شیعی دا و ھەڤڕکیا ئایدلۆژی دناڤبەرا سعودیێ و ئیرانێ ل دەڤەرێ دێ ھاریکاربیت بۆ مەرجەعیەتا شیعی یا عەرەبی ژبۆ ژناڤبرنا تەشەیوعا سیاسی یا ئیرانی ل دەڤەرێ ب تایبەتی ژی ل یەمەنێ و عیراقێ و لوبنانێ و سووریێ و بەحرێنێ.
ڤی پەرلەمانتارێ کورد، خویاکر ژی” سەدر ب لڤینێن خوە یێن سیاسی و لەشکری بزاڤا کێمکرنا کارتێکرنا مەرجەعیێن دینی یێن نە عیراقی و عەرەبی دکەت، لەوما دەمێ (عەبدولمەجید خوئی) کورێ مەرجەعێ بلند ( ابو قاسم خوئی) ژ لەندەن ھاتیە نەجەف پشتی 2003 ێ، ھاتە تیرۆکرن و ئەندامێن رەوتێ سەدری ب تیرۆرکرنا وی ھاتبوونە تومەتبارکرن ژبەرکو ب ھاتنا وی بۆ نەجەف ئانکو نەمانا رۆلێ موقتەدای بوو و موقتەدا سەدر دزانی کو عەبدولمەجید خوئی نەژاد ئیرانی بوو و نە عەرەب و عیراقی بوو”.
د. عەرەفات زێدەتر دبێژیت” سەدر چو دەما بەر ب عەلی سیستانی ڤە نەچوویە، ژ بەر کو سیستانی د بنەرەت دا ئیرانی یە و ھەتا نوکە ژی ئەم چو ھەڤدیتن و پەیوەندی و رەخنان دناڤبەرا موقتەدا سەدر و عەلی سیستانی دا نابینین، بەلکو ھەتا ناڤێ ھەڤدو ژی نائینن، سەرەرای کارێن نێگەتیڤ و پۆزەتیڤ یێن موقتەدا سەدر و رەوتێ وی، بەلێ مە چو داخویانیەک یان ئاماژەیەک ژسیستانی ل سەر نەدیتیە”.