سەروکێ یانا زاخۆ یێ بەرھەڤە پوستێ خوە بو کەسەکێ دی بھێلیت
ئەڤرۆ:
سەروکێ یانا زاخۆ یا وەرزشی راگەھاند ئەو یێ بەرھەڤە پوستێ خوە بو کەسەکێ دی چول بکەت و ب ھەمی شیانا ھاریکاریێ ھاریکاریا وی کەسی بکەت یێ ڤی پوستی وەردگریت.
زێدەتر عەبدولوەھاب محەمەد عیسا سەروکێ یانا زاخۆ ل سەر پێچێ خوە یێ فەرمی ل تورا کومەلایەتی یا فێسبوکی بابەتەک تێدا بەلاڤەکریە و رادگەھینت ئەوا د شیان دا پێشکێشی یانا زاخۆ وەرزشا زاخۆ کریە و ئەوا دھێتە خواستن د ڤان کاودانان دا ژ شیانێن وی زێدەتر و زێدەتر دیارکریە ھەر کەسەکێ بڤێت ببیتە سەروکێ یانا زاخۆ سوز دایە ب ھەمی شیانا ھاریکاریێ لێ بکەت و ل ھەر جھەکێ بیت بمینت خزمەتکارێ یانێ.
ھەر د ڤێ نڤێسینا خوە دا سەروکێ یانا زاخۆ خویاکریە ئاستێ یانا زاخۆ ل ئەڤ سالە وەکو سالێن بوری نینە و قەیرانا داری کارتێکرنا خوە ل سەر ڤێ چەندێ ھەبویە و ھەیڤانە ئەو پێدڤی ب سەد ملیون دینارنە بو موچەیان و ھەتا نوکە بو ماوێ دو سالانە ھیچ کەسەکی ھاریکاریا وان نەکریە و ل دووماھیێ دایە زانین پشتی یاریا بھێت دێ گەلەک گوھورین د یانا زاخۆ دا ھێنە کرن.
دھێتە زانین تیما تەپا پێ یا یانا زاخۆ یا پشکدار د خولا پلا نایاب یا عیراقێ دا ھەتا نوکە ژ سەرجەمێ پێنج یاریێن کرین چوار خال ب دەستخوەڤە ئیناینە و دیسان تیما وێ یا باسکت بولێ ژی د یاریا ئێکێ یا خولا عیراقێ دا د گەل یانا دھوک توشی خوسارەتیێ ببوو.
