سەرکردەکێ ئێکگرتوو: دێ راستیا ئاشکراکەین
ئەڤرۆ نيوز:
ئەندامەکێ مەکتەبا سیاسی یا ئێکگرتوو ئیسلامی گەفێن ئاشکراکرنا راستیان دکەت و دبێژیت پرسا سەرۆکایەتیا ھەرێما کوردستانێ، پرسێن دی یێن گرنگ ژ بیرا حزبان بریە.
خەلیل ئیبراھیم ئەندامێ مەکتەبا سیاسی یا ئێکگرتووی و ئەندامێ شاندێ دانوستاندکارێ ئێکگرتووی د کۆمبوونێن پێنج قۆلی دا راگەھاند، پرسا سەرۆکاتیا ھەرێما کوردستانێ پرسەکا سیاسی یە و پێدڤیە ب سازانەکێ نیشتمانی بھێتە ئێکلاکرن.
ڤی سەرکردێ ئێکگرتووی د داخۆیانیەکێ دا بۆ ئاژانسا ئەنادۆل گوت” لایەنێن سیاسی ل سەر سێ پرسان دناکۆکن ئەوژی ( ویلایەتا سەرۆکێ ھەرێمێ، چاوانیا ھەلبژارتنا وی ئایا دناڤ پەرلەمانی یان دناڤ خەلکی دا و دەستھەلاتێن سەرۆکیچ ھەرێمێ)”.
ب دیتنا خەلیل ئیبراھیمی” نە پارتی دشێت ب تنێ کار بکەت، نە لایەنێن دی ژی (گۆران، ئێکەتی، ئێکگرتوو و کۆمەل) دشێن ب تنێ کارەکێ بکەن و د ڤێ بارودۆخی دا دەربازبکەن و ئەڤ بارودۆخێ نوکە یێ کوردستانێ یێ وێ چەندێ نینە چەند لایەنەک بھێن و نیسابێ قانوونی یێ پەرلەمانی تمام بکەن و لایەنی دی ژی پشکدار نەبیت”.
ل دۆر راسپاردنا مەزنترین لیست یان مەزنترین ھەڤپەیمانی بۆ پێکئینانا حوکمەتێ پشتی ھەلبژارتنێن داھاتی، کو د کۆمبوونا شەشێ یا پێنج قۆلی دا گۆرانێ و ئێکگرتووی بەحس لێکری و داخوازکری، مەزنترین ھەڤپەیمانی حوکمەتێ پێکبینیت، خەلیل ئیبراھیمی بۆچوونا ئێکگرتووی ئاشکرا دکەت و دبێژیت” ل گەل وێ چەندێ بووین مافێ لیستا سەرکەفتی یا ئێکێ یە حوکمەتێ پێکبینیت”.
ناڤبری ب باشی دزانیت، لایەنێن سیاسی بگەھنە سازانی و ب بەرپرسیارەتی رەفتارێ بکەن و خەلکی وەک چاڤەرێی نەھێلن و گوت” ھەکە ب ڤی شێوەی بچیت، دێ مە ئاخڤتن و ھەلویستێ خوە ھەبیت” و ھیڤیا وێ چەندێ خواست کو ل شوینا لایەنێن سیاسی د ڤێ قۆناغێ دا بەحسێ چاکسازیێ و خزمەتکرنا خەلکی، خەما پێشمەرگەی و بێ مووچەیێ و قەیرانا دارایی کربان.
خەلیل ئیبراھیم گەفێن وێ چەندێ کرن” ھەکە کۆمبوونان ئەنجام نەبیت، دێ سەرکردایەتیا ئێکگرتووی ئیسلامی کۆمبیت و پاشی دێ ھەموو راستیەکێ بۆ خەلکێ کوردستانێ ئاشکرا کەین”.
دیسا دوپاتی کر کو پێدڤیە ل دەرڤەی پەرلەمانی رێککەفتنەک بھێتە کرن و پاشی بچیتە پەرلەمانی و رەتکر د کۆمبوونێن پێنج قۆلی دا ببنە دو بەرە (بەرەیێ پارتی ب تنێ و بەرەیێ ئێکگرتوو، ئێکەتی، کۆمەل و گۆران ژ لایەکێ دی) و دبێژیت “د کۆمبوونێن پێنج قۆلی دا ب تنێ دو بەرە نینن، بەلکو ھندەک جاران دبیتە سێ بەرە و بۆچوون”.
ئاماژە ب وێ چەندێ ژی کر”بۆ دەربازبوون ژ ڤێ قەیرانێ، پێدڤیە سازان بھیچتە کرن، یان ھەلبژارتنێن پێشوەخت بھێنە ئەنجامدان”.
