سەرۆكێ پەرلەمانێ كوردستانێ دێ هێتە دادگەهكرن
ئەڤرۆ نیۆز، ئەمیر ئەترووشی:
رێڤینك هروری، سەرۆكێ بەروەخت یێ پەرلەمانێ كوردستانێ راگەهاند، ل سەر سكالایەكا نەوەی نوێ، ئەز یێ هاتیمە داخوازكرن بۆ دادگەهێ و بێ دوو دلی دێ چمە بەرامبەر دادگەهێ و وەكو ئەندام پەرلەمانەك دێ ئەركێ خوە بجهئینم.
رێڤینك هروری، سەرۆكێ بەروەخت یێ پەرلەمانێ كوردستانێ تایبەت بۆ ئەڤرۆ نیۆز دیار كر، د ئێكەم كۆمبوونا پەرلەمانێ كوردستانێ دا پێدڤی بوو دەستەیا سەرۆكاتیا پەرلەمانی بهێتە هەلبژارتن و د وێ كۆمبوونێ دا چو لایەنان كاندید نەبوون و چو رێكەفتن ل سەر ئاستێ حزبان ژی نەهاتبوونە كرن، لەوما هەموو لایەنان ژبلی نەوەی نوێ و كۆمەلێ داخوازنامەك بۆ من نڤێسی بۆ هندێ سەرۆكاتیا روونشتنا ئێكێ بكەم و گۆتن ئەم حەزدكەین روونشتنێ ڤەكری بهێلی هەتا لایەنێن سیاسی دگەهنە رێككەفتنەكێ، من ژی ئەو داخوازنامە ئێخستە دەنگدانێ و هەموو پەرلەمانتاران ب زۆرینەیا دەنگان، ژبلی نەوەی نوێ و كۆمەلێ پەسەندكرن و بوو تشتەكێ مەشروع و هەتا نها ژی من كۆمبوون ڤەكری یا هێلای هەتا كو روونشتنا دوویێ دهێتە كرن و دێ ئێكسەر چینە سەر خالا دوویێ.
هروری ئاشكرا ژی كر، ل وی دەمی نەوەی نوێ سكالا كر و گۆتن ئەڤە نە دادیە و نە قانوونی یە و نە دیموقراتیە و سكالا ل دادگەهێ ل سەر من وەكو سەرۆكێ بەروەخت یێ پەرلەمانی توماركریە و دادگەهێ ژی ئەز ئاگەهداركریمە ل سەر سكالایێ و من ژی بەرهەڤبوونا خوە دیاركریە كو ل رۆژا 18/12/2018 ل دەمژمێر 11ی سپێدێ ل بەرامبەر دادگەهێ حازرببم.
سەرۆكێ بەروەخت یێ پەرلەمانێ كوردستانێ ئەو یەك ژی دیار كر كو ئەز بەرهەڤ بم یان ژی پارێزەرێ من، چو ئاریشە نینە، چونكو ل گۆرەی گۆتنا پارێزەران داخوازی و سكالایا وان چو بۆنیات بۆ نینە و زۆر نۆرمالە ژی وەكو ئەندام پەرلەمانەك ل بەرامبەر دادگەهێ ئامادە ببم و من چو ئاریشە ل گەل هندێ نینە و گۆت: ب تنێ نەوەی نوێ ئەڤ سكالایە تۆماركریە.
رێڤینك هرۆری ئەو یەك ژی نە ڤەشارت كو سكالایا وان گەلەك تشتەكێ بێ مانایە، چونكو من چو سەرپێچی نەكرینە و پێ ل چو قانوونان ژی نەدایە و هاتنا وان بۆ ناڤ پەرلەمانی دەستپێكەكا خراب بوویە، چونكو بۆ ڤێ خۆلا پەرلەمانی مە چاڤ ل كارەكێ باشە و ئەوا چوویی و ئەو قەیرانێن ل سەر هەرێمێ دا هاتینە خوار بهێنە ژبیكرن و نەهێنە دووبارەكرن و گوهۆرین ب سەر رەوشا هەرێمێ دا بهێن.
