سەرۆكێ حوكمەتا هەرێمێ دوپاتیێ ل بهێزكرنا پەیوەندییان ل گەل هندستانێ دكەت
دوهی چارشەمبی 7/5/2025، مەسرور بارزانی، سەرۆكێ حوكمەتا هەرێما كوردستانێ، پێشوازی ل سۆمین باگچی، بالیۆزێ هندستانێ ل ئیراقێ كر.
حوكمەتا هەرێما كوردستانێ د بەیاننامەیەكێدا راگەهاند» د كۆمبوونەكێدا، ب بەرهەڤبوونا مادان گۆپال، قۆنسلێ گشتیێ هندستانێ ل هەرێما كوردستانێ، پێشڤەبرنا پەیوەندیێن دو ئالییانە د وارێن جۆرا و جۆردا هاتە گەنگەشەكرن».
ئاماژە ب وێ چەندێ ژی هاتە كرن» سەرۆكێ حوكمەتا هەرێما كوردستانێ سەرەرای پیرۆزباهییا دەستبكاربوونێ ل بالیۆزێ هندستانێ ل ئیراقێ، پشتەڤانییا حوكمەتا هەرێما كوردستانێ ژی بۆ دیاركر. هەروەسا دوپاتی ل گرنگییا بهێزكرنا پەیوەندیێن هەرێما كوردستانێ ل گەل وەلاتێ هندستانێ كر. هەڤدەم سەرۆكێ حوكمەتا هەرێمێ سوپاسییا قۆنسلێ گشتیێ هندستانێ ژی ل هەرێما كوردستانێ كر ب هەلكەفتا ب دووماهی هاتنا ئەركێ وی».
ب گۆڕەی بەیاننامەیا حوكمەتا هەرێما كوردستانێ» بالیۆزێ هندستانێ ل ئیراقێ پرۆسەیا پێشكەفتنێ و ئاڤەدانیێ ل هەرێما كوردستانێ بلند هەلسەنگاند و خواستا وەلاتێ خوە بۆ پێشڤەبرنا پەیوەندییان ل گەل هەرێما كوردستانێ دوپاتكر، ب تایبەتی د وارێن تەكنەلۆژییا پێزانینان و ب دیجیتالكرنا خزمەتگوزاریێن گشتی و پشتەڤانیكرنا چاكسازیێن حوكمەتا هەرێما كوردستانێ د سیستەمێ بەنكیدا».
حوكمەتا هەرێما كوردستانێ د بەیاننامەیا خوە دا باس ل وێ چەندێ ژی كر» بالیۆزێ هندستانێ ل ئیراقێ دیاركر كو كاری دكەن گەشتێن فرۆكەڤانی یێن راستەوخوە د ناڤبەرا هەولێرێ و باژێرێن هندستانێدا هەبن».
