سەرۆكێ كاتالونیا جارەكادی داخوازا سەربخوەیێ كر
ئەڤرۆنیۆز:
سەرۆكێ هەرێما كاتالونیا یا ئیسپانی یێ ژكار لادای (كارلیس بوتشدیمون) داخواز ژ هێزێن سیاسی ل كاتالونیا كر بەرەیەكی دهەلبژارتنێن داهاتی دا پێكبینن ب مەرەما راگەهاندنا سەربخوەیا هەرێما ناڤبری.
بوتشدیمون د تویتەكی دا ل سەر تۆرا جڤاكی یا تویتەری دا راگەهاند” دەم یێ هاتی پێكڤە ژبۆ كاتالونیا وئازادیا زیندانیێن سیاسی وكومارێ كاربكەین” وداخواز ژ حزبێن كاتالونی كر دئێكگرتی بن ل بەرامبەر حوكمەتا ناڤەندی ودیاكر كو هزر دپشكداریێ دهەلبژارتنێن هەرێما كاتالونیا دا دكەت كو بریارە ل 21 كانوونا ئێكێ یا داهاتی بهێنە ئەنجامدان پشتی لادانا حوكمەتا كاتالونیا ژلایێ حوكمەتا ناڤەندی ڤە ل مەدرید، ژبەر راگەهاندنا پەرلەمانێ كاتالونی بۆ سەربخوەیێ ژ ئیسپانیا.
سەرۆكێ كاتالونیا وچار ژ وەزیرێن وی یێن بەرێ رەتكر بزڤرن بۆ مەدرید ول بەرامبەر دادگەهێ راوەستن، ددەمەكی دا دادگەها بلند 8 بەرپرسێن كاتالونی یێن ژكار لادای دەستەسەر كری هێلاینە هەتا پشتی ب دووماهی هاتنا ڤەكۆلینان دكێشێن وان دا كو تۆمەتێن یاخیبوونێ وئاژاوەگیریێ و دزینا پاران ئاراستەی وان هاتینە كرن. وحوكمەتا ئیسپانیا یاداشتەكا دەستەسەركرنێ دژی سەرۆكێ كاتالونیا دەركریە كو نوكە ل بروكسل پایتەختێ بەلجیكا یە.
