سەرۆكێ هەرێمێ و وەزیرێ بازرگانییا ئیراقێ پرسا بازرگانیكرنێ ل گەل ئیرانێ گەنگەشە كر
سەرۆكێ هەرێما كوردستانێ ل تەهرانێ ل گەل وەزیرێ بازرگانییا ئیراقێ كۆمبوو و هەردو ئالییان باس ل چاوانییا پەیداكرنا دەلیڤەیێن زێدەتر یێن بازرگانیێ ل گەل ئیرانێ كر.
دوهی سێشەمبی 7/5/2024، نێچیرڤان بارزانی، سەرۆكێ هەرێما كوردستانێ د دیدارەكێدا ل گەل ئەسیر داود ئەلغورێزی، وەزیرێ بازرگانییا ئیراقا فیدرال كو نوكە ب سەرەدانەكێ ل تەهرانێیە، پەیوەندی و ئاستێ لڤینێن بازرگانی یێن ئیراقێ و هەرێما كوردستانێ ل گەل ئیرانێ گەنگەشە كر.
ب گۆڕەی بەیاننامەیەكا سەرۆكایەتییا هەرێما كوردستانێ، هەردو ئالییان باس ل بوارێن بازرگانی و چالاكیێن ئابۆری یێن ئیرانێ ل گەل ئیراقێ و هەرێما كوردستانێ و چاوانییا پەیداكرنا دەلیڤەیێن باشتر یێن بازرگانیێ و نەهێلانا ئاستەنگان ل بەردەم كر.
سەبارەت ئەڤێ چەندێ هەردو ئالییان دوپاتی ل گرنگییا بەرفرەهكرنا كەرتێ بازرگانیێ د ناڤبەرا واندا كر كو دێ كاریگەرییا ئەرێنی ل سەر ڤەژاندنا ئابۆری یا هەردو ئالییاندا هەبیت.
