سەرۆك بارزانی:هه‌لبژارتنا ئێكه‌م ژن بۆ سه‌رۆكاتيا په‌رله‌مانى ئاماژا پێشڤه‌چوونا سياسى يه ل هه‌رێمێ
ئه‌ڤرۆنيوز:
سه‌رۆك بارزانى ئه‌ڤرۆ سێشه‌مبى 19/2/2019 پێشوازى ل ئه‌لێكسانده‌ر ديكرۆ جێگرێ سه‌رۆك وه‌زيران ووه‌زيرێ دارايى يێ به‌لجيكى وكريستۆس سپێلانز كۆمسيارێ ئێكه‌تيا ئه‌ورۆپى بۆ هاريكاريێن مرۆڤايه‌تى كر.
دديداره‌كێ دا جێگرێ سه‌رۆك وه‌زيرێن به‌لجيكا پێزانين هه‌بوو بۆ رۆلێ سه‌رۆك بارزانى وهه‌رێما كوردستانێ ل شه‌رێ دژى تيرۆرستێن داعشێ ودروستكرنا سه‌قامگيريێ ل ده‌ڤه‌رێ وراگه‌هاند كو هاتنا وان دووباره‌كرنا وێ په‌يامێ يه كو ئێكه‌تيا ئه‌ورۆپى وبه‌لجيكا پشتگيريا وان بزاڤان دكه‌ن كو ل كوردستانێ وعيراقێ بۆ پێشكه‌فتنێ وبده‌ستڤه‌ئينانا سه‌قامگيريێ وروو ب رووبوونا تيرۆرێ دهێنه ئه‌نجامدان، ئه‌وژى دياركر كو هێشتا كارێ زۆر يێ ماى كو پێدڤيه بهێته كرن دڤى بياڤى دا، له‌وما به‌لجيكا وئێكه‌تيا ئه‌ورۆپى وه‌كو هه‌ڤپشكێن هه‌رێما كوردستانێ دێ مينن وپێگير بن ب وێ هه‌ڤپشكيێ، سوپاسيا داموده‌زگه‌هێن هه‌رێما كوردستانێ ژى كر كو ل ده‌مێ قه‌يرانێ وته‌حه‌دياتان هاريكاريا ئێكه‌تيا ئه‌ورۆپى وجيهانێ بوون ب تايبه‌ت دپرسا شه‌رێ تيرۆرێ وهاريكاريكرنا ئاواره وپه‌نابه‌ران.
جێگرێ سه‌رۆك وه‌زيرێن به‌لجيكا پيرۆزباهى ل سه‌رۆك بارزانى كر ب هه‌لكه‌فتا هه‌لبژارتنا سه‌رۆكێ په‌رله‌مانێ كوردستانێ وب گاڤه‌كا ئه‌رێنى دپێشڤه‌چوونا پرۆسا سياسى ل هه‌رێمێ هژمارت،
ژلايێ خوه‌ڤه سه‌رۆك بارزانى سوپاسيا به‌لجيكا وئێكه‌تيا ئه‌ورۆپى ووه‌لاتێن ئه‌ندام دهه‌ڤپه‌يمانيا دژى داعشێ كر كو ل شه‌رێ دژى تيرۆرستێن داعشێ پشته‌ڤانيا هيزا پێشمه‌رگێ كوردستانێ بوون وزێده‌بارى دووپاتكرنێ كو وێ هاريكاريێ ئه‌نجامێن باش هه‌بوون، ئه‌وژى دووپاتكر كو فه‌رهه‌نگا گه‌لێ كوردستانێ ري ناده‌ته تيرۆرستان پێگه‌ه ل كوردستانێ هه‌بيت ورژدبوونا كوردستانێ ژى ددژايه‌تيكرنا تيرۆرستان ب شاندێ مێهڤان راگه‌هاند.
ل دۆر پرۆسا سياسى يا هه‌رێما كوردستانێ ژى، سه‌رۆك بارزانى زێده‌بارى ئاماژه‌دان ب گرنگيا هه‌ردو هه‌لبژارتنێن په‌رله‌مانێ عيراقێ وپه‌رله‌مانێ كوردستانێ، هه‌لبژارتنا ئێكه‌م ژن وه‌كو وه‌كو سه‌رۆك په‌رله‌مان وهه‌روه‌سا جێگره‌كا ژن بۆ سه‌رۆكاتيا په‌رله‌مانى ب ئاماژه‌كا گه‌له‌ك باش دگه‌شه‌سه‌ندنا سياسى وپێشڤه‌چوونا كه‌لتوورێ سياسى ل هه‌رێما كوردستانێ هژمارت.
