سەرۆك بارزانی:پاشخستنا هه‌لبژارتنان پێشيلكرنا قانوونێ وئيرادا ملله‌تى يه
ئه‌ڤرۆنيوز:
سه‌رۆك مه‌سعود بارزانى ل گه‌ل مه‌كته‌با سكرتاريه‌تا ئێكه‌تيا ئافره‌تێن كوردستانێ كۆمبوو ول دۆر هه‌لبژارتنێن په‌رله‌مانێ كوردستانێ دووپاتكر، چو هێجه‌تێن قانوونى وته‌كنيكه بۆ پاشخستنا هه‌لبژارتنان نينن وپاشخستنا وان پێشيلكرنا قانوونێ وده‌زگه‌هێن هه‌رێمێ وئيرادا ملله‌تى يه.
سه‌رۆك بارزانى ئه‌ڤرۆ ئێكشه‌مبى 2/9/2018 ل گه‌ل سكرتێر وئه‌ندامێن مه‌كته‌با سكرتاريه‌تێ وبه‌رپرسێن جڤاتێن پارێزگه‌هان يێن ئێكه‌تيا ئافره‌تێن كوردستانێ كۆمبوو.
دكۆمبوونێ دا، سه‌رۆك بارزانى رۆناهى خسته سه‌ر رۆلێ ديرۆكيێ ئافره‌تان ل بزاڤا ريگاريخوازا گه‌لێ كوردستانێ ب تايبه‌ت ل شۆره‌شا ئه‌يلوولێ وگۆلانێ وقۆناغێن دى يێن خه‌بات وئاواره‌ييێ، هه‌روه‌سا رۆلێ ئافره‌تێن كوردستانێ ل پێگه‌هاندنا رۆلێن نيشتمانپه‌روه‌ر وئازا بۆ به‌رگريێ ژ ماف وئاخ وكه‌رامه‌تا كوردستانێ بلند نرخاند.
سه‌رۆك بارزانى ده‌ستخوه‌شى وسوپاسيا خوه ئاراسته‌ى ئێكه‌تيا ئافره‌تێن كوردستانێ كر بۆ بزاڤ ووه‌ستيانا وان دچاره‌كرنا كێشێن ئافره‌تان دا وهاريكاريا پێشمه‌رگه‌ى و خه‌لكێ ئاواره ولێقه‌وماى وپشته‌ڤانيا خوه بۆ ئێكه‌تيا ئافره‌تان وبزاڤێن باشتركرنا ره‌وشا ئافره‌تان وهاريكاريا وان راگه‌هاند وداخواز كر بزاڤێن نه‌هێلانا جوداهيێ وسته‌م وئازاردانا ئافره‌تان بهێنه چركرن.
دپشكه‌كا دى يا كۆمبوونێ دا، سه‌رۆك بارزانى ره‌وشا سياسى يا عيراقێ وكوردستانێ شرۆڤه‌كر وهه‌لويستێ خوه ل دۆر پرۆسا سياسى يا عيراقێ ب به‌رهه‌ڤبوويان راگه‌هاند،
سه‌باره‌ت هه‌لبژارتنێن په‌رله‌مانێ كوردستانێ، سه‌رۆك بارزانى دياركر كو چو هێجه‌تێن قانوونى وته‌كنيكى بۆ پاشخستنا هه‌لبژارتنان نينن وپاشخستنا وان پێشيلكرنا قانوون وده‌زگه‌هێن هه‌رێمێ وئيرادا ملله‌تى يه و سته‌مه‌كه كو ل خه‌لكى دهێته كرن وب پێدڤى زانى كو هه‌لبژارتن ل ده‌مێ خوه يێ دياركرى دا بهێنه ئه‌نجامدان.
