سەرۆك بارزانی: دانوستاندنێن ئالییان بۆ پێكئینانا حوكمەتێ دێ ب سەركەفتییانە هێنە ئەنجامدان
دوهی ئێكشەمبی 17/11/2024، سەرۆك مەسعود بارزانی، ل سەلاحەدین پێشوازی ل مارجن كوبیاك، بالیۆزێ پۆلەندا ل ئیراقێ كر.
بارەگەهێ بارزانی د بەیاننامەیەكێدا بەلاڤكر» د دیدارەكێدا، بالیۆزێ پۆلەندا ل ئیراقێ پیرۆزباهییا سەركەفتنا پڕۆسەیا هەلبژارتنێن خولا شەشێ یا پەرلەمانێ كوردستانێ و سەركەفتنا پارتی دیموكراتی كوردستان وەكو سەركەفتییا ئێكێ د وان هەلبژارتناندا ل سەرۆك بارزانی كر. هەروەسا رێز بۆ رۆلێ سەرۆك بارزانی و دەزگەهێن هەرێما كوردستانێ د پەیداكرنا سەقامگیریێ و ڤەژاندنا هەرێمێ هەبوو، هەروەسا دیاركر ژی كو وەلاتێ وی ب گرنگییەكا مەزن دنێریتە رۆلێ هەرێما كوردستانێ ل ئیراقێ و دەڤەرێ و پۆلەندا دخوازیت پەیوەندی و دۆستایەتیێ ل گەل هەرێما كوردستانێ د وارێن پەروەردێ و خواندنا بلند و چاندنێ و وارێن دی پێشبێخیت».
هەر د وێ دیدارێدا، سەرۆك بارزانی سوپاسییا بالیۆزێ پۆلەندا ل ئیراقێ كر و دوپاتی ل دۆستایەتی و پەیوەندیێن هەردو ئالییان كر. سەرۆك بارزانی، سەرەرای ئاماژەدان ب هەلبژارتنێن پەرلەمانێ كوردستانێ راگەهاند» پشكدارییا گەلێ كوردستانێ ب رێژەیەكا بەرچاڤ ج هەلبژارتناندا و د سەقایەكێ ئارامدا سەرێ مە هەموویان بلندكر» ئەوژی بەرچاڤكر» هەروەكو چاوان هەلبژارتن ب سەركەفتییانە هاتنە ئەنجامدان، قۆناغا پێكئینانا حوكمەتێ و دانوستاندنێن ئالییان دێ ب سەركەفتی گەهنە ئەنجام».
گۆت ژی» دخوازین حوكمەتەكا بنكەه بەرفرهە ئەوژی ب گۆڕەی ئیستیحقاقا هەلبژارتنان بهێتە پێكئینان».
هەروەسا د ڤێ دیدارێدا گەنگەشە ل دۆر سەرەدانا ڤێ دووماهیێ یا سەرۆك وەزیرێن ئیراقێ بۆ هەرێما كوردستانێ و بزاڤێن دهێنە كرن بۆ پاراستنا سەقامگیرییا ئیراقێ و دوورئێخستنا ئیراقێ ژ مەترسیێن داهاتی و هەڤكێشەیێن دەڤەرێ، هاتە كرن.
