سەرۆك بارزانی ل گەل کونسۆلا نوو يا ئەلمانیا ل هەولێرێ کۆمبوو
ئه‌ڤرۆنيوز:
سه‌رۆك مه‌سعود بارزانى، ئه‌ڤرۆ چارشه‌مبى 8 ته‌باخا 2018 ل گه‌ل باربارا وولف، كونسۆلا نوو يا ئه‌لمانيا ل هه‌ولێرێ كۆمبوو.
دديداره‌كێ دا، په‌يوه‌نديێن دناڤبه‌را هه‌رێما كوردستانێ وئه‌لمانيا هاتن به‌حسكرن وكونسۆلا نوو يا ئه‌لمانيا دياركر كو ئه‌لمانيا دێ به‌رده‌وامبيت ل سه‌ر مه‌شق وراهێنان وهاريكاريا هێزا پێشمه‌رگێ كوردستانێ وهه‌موو شيانێن خوه بۆ زێده‌تر پێشڤه‌برنا په‌يوه‌نديێن دناڤبه‌را ئه‌لمانيا وهه‌رێما كوردستانێ دێ بكارئينن.
هه‌ر ل وێ ديدارێ ره‌وشا سياسى يا عيراقێ پشتى هه‌لبژارتنان وپرۆسا پێكئينانا حوكمه‌تێ هاته به‌حسكرن، كونسۆلا ئه‌لمانيا راگه‌هاند كو ئه‌لمانيا پشته‌ڤانيێ ل پرۆسا ديموكراسيێ ل هه‌رێمێ وسه‌روه‌ريا قانوونێ وئه‌نجامدانا هه‌لبژارتنێن كوردستانێ ل ده‌مێ دياركرى يێ خوه دا دكه‌ت.
سه‌رۆك بارزانى، زێده‌بارى ب خێرهاتنا كونسۆلا نوو يێ ئه‌لمانيا كر وهيڤيا سه‌ركه‌فتنێ بۆ خواست وپه‌يوه‌نديێن دناڤبه‌را گه‌لێ كوردستانێ وگه‌لێ ئه‌لمانيا ب دۆستانه ونموونه‌يى هژمارت وپشته‌ڤانيا خوه بۆ زێده‌تر پێشڤه‌برنا په‌يوه‌نديێن هه‌رێما كوردستانێ ل گه‌ل ئه‌لمانيا به‌رچاڤكر.
هه‌روه‌سا سه‌رۆك بارزانى سوپاسيا گه‌ل وحوكمه‌تا ئه‌لمانيا ژى كر كو ل شه‌رێ دژى تيرۆرستان دا هاريكاريه‌كا كاريگه‌ر پێشكێشى هێزا پێشمه‌رگێ كوردستانێ كريه وداخوازكر په‌يوه‌نديێن هه‌ردولا به‌رفره‌هتر ببن وده‌ستخوه‌شى ل وان بزاڤان كر ب مه‌ره‌ما پێشڤه‌برنا ئابوورى خستينه به‌رنامێ كارێ خوه.