سەرۆك بارزانی و مەحموود مەشهەدانی دوپاتیێ ل چارەسەرییا ب لەز یا كێشەییا مووچەی دكەن
سەرۆك بارزانی د پێشوازییا مەحموود مەشهەدانی، سەرۆكێ جڤاتا نوونەرێن ئیراقێ، دووپاتی ل چارەسەركرنا كێشەیان د چارچۆڤەیێ دستووریدا كر.
دوهی ئێكشەمبی 6/7/2025 ل سەلاحەدین سەرۆك مەسعود بارزانی پێشوازی ل شاندەكێ جڤاتا نوونەرێن ئیراقێ ب سەرۆكایەتییا مەحموود مەشهەدانی، سەرۆكێ جڤاتا نوونەران كر.
د دیدارەكێدا گەنگەشە و لێكگۆهارتنا بیر و بۆچوونان ل دۆر رەوشا سیاسییا ئیراقێ و كێشەیێن د ناڤبەرا حوكمەتا ئیراقا فیدرال و حوكمەتا هەرێما كوردستانێدا، هەروەسا بڕیارا بڕینا مووچەیێ فەرمانبەرێن هەرێما كوردستانێ هاتە كرن و دووپاتی ل وێ چەندێ هاتە كرن كو پێدڤییە د چارچۆڤەیێ دستووری و ل بەرچاڤ وەرگرتنا بنەمایێن هەڤشكیێ و هەڤسەنگیێ و لهەڤهاتنێ كێشە بهێنە چارەسەركرن و ب هیچ شێوەیەكی ژی قووتێ هەڤوەلاتیێن هەرێما كوردستانێ تێكهەلی ناكۆكیێن د ناڤبەرا ئالیێن سیاسی و هەردو حوكمەتێن فیدرال و هەرێما كوردستانێ نەهێنە كرن و ب زووترین دەم كێشەیا مووچەی و شایستەیێن دارایی یێن هەرێما كوردستانێ بهێتە چارەسەركرن.
هەلبژارتنێن داهاتی یێن جڤاتا نوونەرێن ئیراقێ و هەماهەنگی د ناڤبەرا ئالییاندا ژ پێخەمەت چارەسەركرنا كێشەیان و راستڤەكرنا شاشی و كێماسیێن د ناڤا پرۆسەیا سیاسییا ئیراقێدا تەوەری دی یێ دیدارێ بوون.
