سەرۆکێن ھەموو زانکۆیان دێ ھێنە گوھۆڕین
ئه‌ڤرۆ نيوز:
بڕیارە سەرۆکێن زانکۆیان ل سەرانسەری ھەرێما کوردستانێ بھێنە گوھۆڕین و ژێدەرەک ژی دبێژیت، بتنێ سەرۆکێن شەش زانکۆیا د قانوونینە و یێن دی ھەموویان دەمێ خوە یێ قانوونی دەربازکریە و پشتی گوھۆڕینێن راگر و سەرۆک پشکان دێ پڕۆسا گوھۆڕینا سەرۆکێن زانکۆیا دەست پێ کەت.
ژێدەرەکێ ئاگەھدار ل وەزارەتا خواندنا بلند و ڤەکۆلینێن زانستی بۆ رۆژناما ئەڤرۆ ئاشکرا کر کو بتنێ سەرۆکێن شەش زانکۆیێن ھەرێما کوردستانێ ب شێوەکێ قانوونی د پۆستێن خوە دا ماینە و دەمێ وان تمام نەبوویە ئەو ژی زانکۆیێن (چەرمو، دھۆک، پۆلیتەکنیکی دھۆک، پۆلیتەکینیکی سلێمانی، کوردستان، کۆیە) و گۆت: “دەمێ قانوونی یێ ھەموو سەرۆک زانکۆیێن دی یێن ھەرێما کوردستانێ ب سەرڤەچوویە و دڤێت بھێنە گوھۆرین، چونکی ل دووڤ قانوونێ دڤێت ھەر کەسەک بتنێ بۆ دەمێ چار سالان سەرۆکێ زانکۆیێ بیت”.
ھەمان ژێدەر ئاماژە دا وێ چەندێ کو نابیت چو سەرۆک زانکۆ زێدەتری ھەشت سالان د پۆستێ خوە دا بمینن و گۆت: “پشتی پڕۆسا گوھۆڕینا سەرۆک پشک و راگر و ھاریکارێن سەرۆکێن زانکۆیا دێ دەست ب گوھۆڕینا سەرۆکێن ھەموو زانکۆیێن ھەرێما کوردستانێ ھێتەکرن و تژیکرن دێ ب پۆست ھێنە راگەھاندن پشتی پێشکێشکرنا سیڤیان دێ دیدار دگەل بەربژێران بۆ پۆستێن سەرۆکێن زانکۆیان ھێنەکرن و ھەر کەسەکێ مەرج ل دەف ھەبن بێ جوداھی مافێ پێشکێشکرنێ ھەیە”.
