سەرۆکێ ئێکەتیا زانایایێن ئیسلامێ: مە دەولەتا کوردستانێ دڤێت نەیا کوردی
ئەڤرۆ نیوز:
سەرۆکێ ئێکەتیا زانایایێن ئاینێ ئیسلامێ ل کوردستانێ بۆ رۆژناما ئەڤرۆ دیار کر، پشکداریکرن د ریفراندۆمێ دا پەیامەکە بۆ تەڤایا جیھانێ و سەرجەم وەلاتێن زلھێز، ل ھەمان دەمی پشتەڤانیە بۆ سەرکردایەتیا سیاسی یا کوردی.
دکتۆر عەبدوللا سەعید سەرۆکێ ئێکەتیا زانایایێن ئاینێ ئیسلامێ ل کوردستانێ دیار کر، کو ھەرێما کوردستان نھا ل گەل عیراقێ دژیت کو مانا ل گەل عیراقێ مانەکا ب زۆری یە، چونکی سالا 1921 دەمێ عیراق ھاتیە دروستکرن رەئیا کوردان نەھاتیە وەرگرتن، ئەرێ کوردان دڤێت دگەل عیراقێ بژین یان نە؟، بەلکو بێ ئیرادا کوردان ل سەر ھاتیە فەرزکرن دگەل عیراقێ بژین، ھەروەسا رەئیا چ مەسیحی و ئێزدیان ژی نەھاتیە وەرگرتن و گۆت “ئەڤرۆ بەحسێ ریفراندۆمێ دھێتە کرن راستەوخۆ ئەم دبێژن ئێدی مە نەڤێت دگەل عیراقێ بژین و مە دڤێت ب سەربخۆ بژین و ئەڤ رەئی وەرگرتنە ئێکە ژ بنەمایێن ھەری سەرەکی یێن ھەمی ئاینان و ئەم نابێژین مە دەولەتا کوردی دڤێت، بەلکو دێ دبێژین مە دەولەتا کوردستانێ دڤێت، چونکی کوردستان مالا ھەموو نەتەوایە و نە مالا کوردان ب تنێ یە”.
ناڤبری گۆت ژی “ئەرێ بۆچی سەرخوەبوون بۆ باشوورێ سودانێ ھەبیت، بۆچی بۆ کوردان نابیت؟ بۆچی 23 دەولەتێن عەرەبی یێن ھەین کوردان ماف نینە وەکو دەولەت ل سەر ڤی ئەردی بژیت؟”.
ھەژی گۆتنێ یە بەری دو رۆژان ژی سەرۆکێ ئێکەتیا زانایایێن ئاینێ ئیسلامێ ل کوردستانێ و نوونەرێن ھەر سێ ئاینێن ل شێخان (ئیسلام، ئێزدی و مەسیحی) و ل گەل قائیمقمێ قەزا شێخان و بەرپرسێ لقێ 20ێ شێخان و ب پشکداریا پتری 250 مامۆستایێن ئاینی و خۆتبەخوینێن مزگەفتێن شێخان یا ب ھەڤکاریا رێڤەبەریا ئەوقافا شێخان ل ژێر درووشمێ (بەلێ بۆ ریفراندۆمێ) ل ھۆلا پەروەردا شێخان کۆم ببون.
