سەرۆکێ ئێکەتیا مامۆستایان: دڤێت ئوفێن شەمبیان بمینن
ئه‌ڤرۆ نيوز:
پشتی کو وەزارەتا پەروەردێ ل ڕۆژێن بۆری بڕیارا راکرنا ئوفێن شەمبیا ل ناڤەندێن پەروەردێ دەرکری نەڕازیبوونا مامۆستایان دووڤ دا ھات و سەرۆکێ ئێکەتیا مامۆستایێن کوردستانێ ژی دبێژیت، بڕیاربوو ئەڤ سالە ژی شەمبیان ئوفبیت و گۆت: “ل وەلاتێن دەوروبەر ژی رۆژێن شەمبی بھێنڤەدانە”.
ئەحمەد گەرمیانی، سەرۆکێ ئێکەتیا مامۆستایێن کوردستانێ بۆ رۆژناما ئەڤرۆ ئاشکرا کر کو ئەو دگەل وێ چەندێ نینن ئوفێن رۆژێن شەمبیان بھێنە راکرن ل کەرتێ پەروەردێ و پێدڤیە ئەڤ بڕیارە بھێتە ھەلوەشاندن و گۆت: “دخوازین وەزارەتا پەروەردێ پێداچوونێ د بڕیارا خوە دا بکەت، ژ بەر کو کاودانێن نوکە د گونجای نینن کو مامۆستا بشێت ھەموو رۆژێن حەفتیێ دەوامێ بکەت و دڤێت حوکمەت رەوشا ئابووری یا مامۆستایان بەرچاڤ بگریت، چونکی ل وەلاتێن جیرانێن ھەرێما کوردستانێ ژی رۆژێن شەمبیان بھێندانە بۆ کەرتێ پەروەردێ”.
ژ لایێ خوە ڤە ژی بەرھەم مستەفا ئەندامێ سکرتاریەتا ئێکەتیا مامۆستایێن کوردستانێ بۆ رۆژناما ئەڤرۆ دیار کر کو ئەو ژی دژی ئەڤێ بڕیارا پەروەردێ یە، ژ بەر کو ھێشتا حوکمەت نەشیایە پاشەکەفتی ل سەر مووچێ مامۆستایان لادەت دێ چاوا دەوامێ زێدەکەت، ھەر چەندە وەزیرێ پەروەردێ پەیوەندی ب وی کریە و ئەو پشتڕاست کریە کو دێ ھەموو بزاڤەکێ کەن رەوشا ئابووری یا مامۆستایان باشتر لێ بکەن و ل دۆر مووچێن بەرێ ژی دێ بڕیار ھەبن.
