سەرۆکێ حوکمەتێ و نوونەرا سکرتێرێ UN ل عیراقێ کۆمبوون
ئەڤرۆ نیوز:
مەسرور بارزانی سەرۆکێ حوکمەتا هەرێما کوردستانێ پێشوازی ل جینین پلاسخارت نوونەرا تایبەت یا سکرتێرێ گشتی یێ نەتەوێن ئێکگرتی ل عیراقێ کر.
د کۆمبوونێ دا سەرۆکێ حوکمەتا هەرێما کوردستانێ راگەهاند کو راگرتنا مووچێ فەرمانبەرێن هەرێما کوردستانێ ژ ئالیێ حوکمەتا عیراقێ بنپێکرنا دستووری یە و نابیت عیراق بابەتێ مووچێن فەرمانبەران وەکو کارتەکا فشارێ ل دژی هەرێما کوردستانێ بکار بینیت.
سەرۆکێ حوکمەتێ ئەو یەک ژی دیار کر کو دەمێ کابینا نەهێ یا حوکمەتێ دەست ب کارێ خوە کری وان سەرەدانا بەغدا کرینە و نیازپاکیا خوە بۆ چارەسەریا هەموو پرسێن د ناڤبەرا هەرێما کوردستانێ و بەغدا دا دیار کرینە.
مەسرور بارزانی ئەو یەک ژی دیار کر کو هەرێما کوردستانێ بەرهەڤە هەموو ئاریشێن هەی ل گۆر دستووری ل گەل بەغدا چارەسەر بکەت.