سەرۆکێ داخوازکەرێ گشتی: چو رێکەفتن بۆ رێیا ئۆتێلا ریکسۆس نەھاتینە کرن
ئەڤرۆ، نیوار محەمەد سەلیم:
سەرۆکێ داخوازکارێ گشتی ل دھۆکێ راگەھاند کو رێیا ریکسوس نەھاتیە ڤەکرن و چو رێکەفتن ژی نەھاتینە. دا زانین ژی کو نابیت رێیەکا ب تنێ بھێتە ڤەکرن دێ ئاریشان زێدەتر لێ کەت.
قاسم حەسەن عەبدولقادر، سەرۆکێ داخوازکارێ گشتی ل دھۆکێ د داخۆیانیەکێ دا بۆ رۆژناما ئەڤرۆ دیارکر کو ھەکە جاددە ب دروستی نەھێتە ڤەکرن ئەو نەھاتیە ڤەکرن و گۆت: “ھەکە ئەو رێیەکێ ڤەکەن و جاددە ئێک لا بیت دێ کێشێ مەزنتر لێ کەن و دێ ئاریشە پەیدا بن”.
سەرۆکێ داخوازکارێ گشتی ل دھۆکێ زێدەتر گۆت: “پێدڤیە ئەو جاددا خزمەتگۆزاری یا ژ لایێ حوکمەتێ ڤە ھاتیە چێکرن وەکو مافەکێ وەلاتیان بھێتە ڤەکرن”.
ئاشکەرا ژی کر کو کەس ھەبووینە وچووینە دەف و گەفێن ڤەکرنا رێ ب ھێزێ کرینە، بەلێ وی داخواز ژێ کریە کو سەبرێ بکێشن و ئەو دێ بابەتی ب رێیا قانوونی چارە کەت و گۆت: “ئەز مرۆڤەکێ ئاشتی خوازم و من نەڤێت نەخۆشی پەیدا ببن”.
سەرۆکێ داخوازکاریا گشتی ئاماژە ب وێ چەندێ ژی کر کو پێدڤیە ئەو کابینێن پۆلیسان ژی نەمینن، ل گەل وان کێلبستۆنێن ھاتینە دانان، “ل پشت ئۆتێلێ ژی جھێن گرتین و کابینە یێن داناینێ”.
قاسم حەسەن ئاماژە کرە گۆتنا مەسعود بارزانی، دەما دبێژیت “کەس ژ قانوونێ مەزنتر نینە.” و گۆت: “دێ نوکە بینین کا مرۆڤێن ژ قانوونێ مەزنتر ھەنە یان نە”.
گۆتژی: “ئەم یێ ل گەل نوونەرێ باژێرڤانیێ ژی ئاخفتین و مەیا گۆتیێ کو چو رێکەفتن نینن و پێدڤیە ئەو رێ ب دروستی بھێتە ڤەکرن و مافێ گشتی یە و پێدڤیە بھێتە چارەکرن”.
ل 15ی چریا دویێ 2017 سەرۆکێ داخوازکاریا گشتی داخواز ژ دادگەھا ڤەکۆلینا ل دھۆکێ کربوو کو پێرابوونێن پێدڤی ل ھەمبەر سەرپێچیا خودانێ ئۆتێلا ریکسوس وەربگرن بەرامبەر رێ نەدان ب ڤەکرنا رێیا خزمەتگۆزاری.
پاشان پشتی بەلاڤبوونا ڤی بابەتی ل تۆڕێن جڤاکی و دەنگڤەدانا مەزن یا وەلاتیان ل سەر ڤێ چەندێ باژێرڤانیا دھۆک ل گەل خودانێ ئۆتێلا ریکسوس رێکەفتنەک کر کو ئوڤەرپاسەک بھێتە چێکرن دا کو رێ ل وێرێ نەھێتە گرت و ھاتنوچوونێ ژی چەندین رێیێن دی یێن لاوەکی ڤەکرن دا کو ئەو رێ نەھێتە ڤەکرن، بەلێ ھەر نەبوو چارە.
یونس عەلی بەرپرسێ پشکا تەکنیکی ل سەرۆکاتیا باژێرڤانیا دھۆکێ بۆ رۆژناما ئەڤرۆ دیارکر کو ئەو و کارگێریا ئۆتێل ریکسۆس گەھشتینە رێکەفتنەکا ناڤین کو شەش مەتر بۆ ھاتنوچوونا وەلاتیان و ترۆمێلان ل بەرامبەر ئاڤاھیێ ئۆتێلێ بھێنە ڤەکرن کو زیان نەگەھنە وەلاتیان و خودانێ ئۆتێلێ ژی.
رۆژناما ئەڤرۆ سەرەدانا جھێ ڤەکرنا رێ ل بەرامبەر ئۆتێل ریکسوس کر و دیار بوو کو ئەو چارەیا وان ل گەل باژێرڤانیێ دیتی نە ڤەکرنا جاددا خزمەتگۆزاری یە، بەلکو ھندەک کلبستۆنێن مەزنتر ل بەرامبەر جاددێ داناینە و دێ شووستەیی و جھێ کەسکاتی وەکو جاددە بکارئینن.
