سەرۆکێ پەیمانگەها ڤەکولینێن کوردی ئەمریکی: دۆنالد ترەمپ دوبارە دێ بێتە سەرۆکێ ئەمریکا
ئەڤرۆ نیوز ، زنار تۆڤی:
کارۆخ خۆشناو سەرۆکێ پەیمانگەها ڤەکولینێن کوردی ئەمریکی، د دیدارەکێ دا بۆ ئەڤڕۆ دیار کر: پرانیا ئاماژا بۆ هندێ دچن، کو ترەمپ دێ شێت دوبارە بۆ گەرا دویێ سەرکەفتنێ ب دەست ڤە ئینیت، د هەلبژارتنێن سەرۆکاتیا ئەمریکا دا، کو دێ ل هەیڤا (۱۱) یا ئەڤ سالە برێڤە چن، ژ بەر ئەڤان هۆکاران دێ ترەمپ سەرکەڤیت، چونکی ترەمپی سەرکەفتن ل هەمبەر سیاسەتا نافخۆیی یا ئەمریکا دا ئینایە، دیسان دیموکراتان شکەستن ل جڤاتا پیران د پرسا لێ پرسینێ ژ دۆنالد تڕەمپی دا ئینایه، چونکی دیموکرات نەشیان دەنگێن پێدڤێ ب دەست خوە ڤە بینن، ئەم پرسە هاتە ڕەتکرن ب (٥۱)دەنگان، بەرامبەر (٤۹)دەنگان، هەروەسا بڕیارە سوبەهی (۲۰۲۰/۲/٥) دادگەهکرنا تڕەمپی ل جڤاتا پیران د بەرژەوەندیا تڕەمپی دا ب دوماهی بهێت، ئەڤ چەندە دێ بیتە شکەستنەکا مەزن بۆ دیموکراتیان و دێ بیتە سەرکەفتنەکا مەزن بۆ ترەمپی.
کارۆخی ئەو ژی گۆت: دۆخێ ئابووری یێ ئەمریکا ل سەردەمێ خولا ئێکێ یا سەرۆکاتیا تڕەمپی دا ڤەژاندنەکا بێ وێنە ب خوەڤە دیتیە، کو ئەڤە (٥۰) سالە ئەمریکا ئەڤ دۆخێ ئابووری ب خوەڤە نەدیتییە، کو ڕێژا بێکاریێ کێمبوویە بۆ (۳٪)، هەروەسا تڕەمپ ب کێمکرنا باجێ شیان چەندین کۆمپانیێن زەبەلاح یێن ئەمریکا ژ دەرڤە بینیتە دناڤا ئەمریکا دا، ب ڤێ چەندێ شیا زێدەتر ژ پێنج ملیۆن دەلیڤێن کاری بۆ ئەمریکیان پەیدا بکەت، هەروەسا کۆماری ئێکگرتی ترن ژ دیموکراتیان، هەروەسا رکابەرێن تڕەمپی ژ پارتا دیموکرات د لاواز و پەرتەوازەنە و نە د وی ئاستی دانە کو بشێن شکەستنێ بگەهیننە ترەمپی، لەوما ناهێتە چاڤەرێ کرن، کو ئێک ژ هەڤرکێن تڕەمپی (جۆ بایدن، بێرنی ساندەرس، ئەلیزابێث وارن) بشێن کورسیێ سەرۆکاتیێ ل ژێر رکێفا ترەمپی دا دەربینن.
ناڤهاتی ئەو چەند ژی ئاشکرا کر: هەر چەندە پرانیا میدیایێن زەبەلاح یێن ئەمریکا وەکو (سی ئێن ئێن، واشنتۆن پۆست، نیویۆرک تایمز…هتد)، ل دژی ترەمپی کار دکەن، بەلێ تڕەمپ گەلەک زیرەکانە شیایە ڤێ دژاتیا میدیایێن زەبەلاح بۆ بەرژەوەندیا خوە رابکێشیت، هەروەسا د ئاستێ سیاسەتا دەرڤە یا ئەمریکا ترەمپی سەرکەفتن ئینایە، ب سایا سەرۆکاتیا تڕەمپی پێگەهـ و رۆلێ ئەمریکا ل سەر ئاستێ جیهانێ ب هێزتر لێ هاتیە، هەروەسا پێگەهـ و رۆلێ نەیار و دوژمنێن ئەمریکا ژی لاوازتر بوویە، دیسان تڕەمپ شیایە هەتا رادەکێ باش هەیبەتێ بۆ ئەمریکا ڤەگەرینیت، دیسان ترەمپ شیا رێککەفتنا ئەتومی هەلوەشینیت و سزایێن ئابووری بێخیتە سەر ئیرانێ و ب ڤێ چەندێ ئیران لاواز و دۆرپێچ کریە، هەروەسا ترەمپ شیایە دوژمنێن سەرسەخت یێن ئەمریکا وەکو ئەبوبەکر بەغدادی ل سووریێ و قاسم سلێمانی و ئەبو مەهدی ئەلموهەندس ل عیراقێ و قاسم ئەلریمی ل یەمەنێ ب کوژیت.
سەرۆکێ پەیمانگەها ڤەکولینێن کوردی ئەمریکی گۆت ژی: ترەمپ شیا ئەندامێن هەڤپەیمانیا ناتۆ بۆ پابەند بوونێ ب پێدانا ئابوونێن سالانە نەچار بکەت بدەن، کو پێکهاتیە ژ (۲٪) یا سەرجەمێ داهاتێ وان وەلاتان، هەروەسا شیا دوبارە کۆمەکا رێککەفتنێن بازرگانی ب جۆرەکێ دابرێژیت کو د بەرژەوەندیا ئەمریکا دا بن، وەکو رێککەفتنێن بازرگانی یێن ئەمریکا ل گەل هەر ئێک ژ چین و کەنەدا و مەکسیک، هەروەسا ترەمپ شیا پشتەڤانیێ ل (بۆریس جەنسن) سەرۆک وەزیرێن زریتانیا بکەت، بۆ دەرچوونا بریتانیا ژ ئێکەتیا ئورۆپا کو ب برێگزێت یا ناسیارە، ترەمپی هەر ل دەستپێکێ بریتانی هان ددان، کو دەنگی بدەن بۆ دەرچوونێ ژ ئێکەتیا ئورۆپا.
هەروەسا دیار کر ژی: کو دۆنالد ترەمپێ بزنسمان، بێی هەبوونا پاشخان و باگراوەندەکێ سیاسی، شیا ب شێوازەکێ نوو یێ نموونەیی و ب رێیا توویتەری سیاسەتەکا روون و راشکاوانە پەیرەو بکەت، ژ پێناڤی ب هێزکرنا پێگەهێ ئەمریکا، دیسان د دەمەکێ دا ترەمپ شیا پرانیا سۆزێن خوە ل خولا ئێکێ یا هەلبژارتنێن سالا (۲۰۱٦) بجهـ بینیت، لەوما د ئەڤ سالە دا ترەمپ دێ شێت د هەلبژارتنێن سەرۆکاتیا ئەمریکا دا ل هەیڤا (۱۱) دوبارە کورسیێ سەرۆکاتیێ و کۆچکا سپی یا ئەمریکا ب دەست خوەڤە ئینیت.