سەرۆکێ ھەرێما کوردستانێ پەیامەک بەلاڤکر

ئەڤرۆ نیوز:
سەرۆکێ ھەرێما کوردستانێ ب ھەلکەفتا ھاتنا جەژنا نەورۆزێ پەیامەک بەلاڤکر و تێدا ئاماژە ب وێ چەندێ کر کو د نەورۆزا ئەڤ سالە دا سەرەدانا مالا شەھید ھوجام ل شوونا ھەموو شەھیدێن کوردستانێ و دو میحوەرێن پێشمەرگەیی ل شوونا ھەموو پێشمەرگەیی کریە.

ئەڤا ل خوارێ ناڤەرۆکا پەیاما سەرۆکێ ھەرێما کوردستانێ یە:
من خواست ژ بۆ جەژنا نەورۆزێ ل شوونا ھەموو مالێن شەھیدان سەردانا مالا شەھید ھوجام بکەم و ل شوونا ھەموو پێشمەرگەیێن قەھرەمانێن ل سەنگەرا بەرگریێ، سەردانا دوو میحوەرێن رووبرووبوونێ بکەم بۆ کو ھەست و سۆزا خوە بەرامبەر شەھیدێن سەربلند و پێشمەرگەیێن جان ل سەر دەستان دەرببرم.
بەری ل ٢٧١٥ سال، کورد ب ناڤێ سەربخوەیی و سەرفرازیێ تێکۆشیایە، ھەر ژ وێ رۆژا کاوەیێ ئاسنگەر سەرێ زھاکی پانکر ھەتا کو گەیشتیە سەید ئوبەیدوڵایێ نەھری، شێخ عەبدولسەلامێ شەھید، شێخ سەعیدێ پیران، سەیید رزا، شێخ مەحموودێ نەمر، شێخ عەبدولسەلامێ بارزانی، پێشەوا قازی، شێخ ئەحمەدێ بارزان و مەلا مستەفایێ بارزانی، ئیرۆ ژی زارۆیێن وان خوەندنگەھێن بەرخوەدانێ، ل کۆبانێ ھەتا شەنگال و خانەقینێ دیرۆکێ دووبارە کرن کو مەزنترین رێکخستنا تیرۆریستیا جیھانێ تێکوشکینن و ھەموو دنیایێ پێ سەرسام بوو.
ئەم ھەموو خوەندەکارێن وێ خواندنگەھێ ینە کو وەھا ھاتینە پەروەردە کرن، کو ژیان ل وێ مرنێ دایە کو ب ناڤێ گەل و نشتمان دا بیت و مرن ژی ل ژیانا بن دەستیێ دایە.
گەلێ کوردستانێ دلنیا بیت، کو ئالایێ کوردستانێ ھەر بلند و شەکاوە دبیت و کوردستان دێ ھەر یا پاراستی بیت. د ئەنجام دا دەستکەفت ژی پێویستە ل ئاستا وێ قوربانیدانێ بن.
ھەزاران سلاڤ ل گیانێ پاکێ شەھیدان و ژ خودایێ مەزن ھێڤیدارین شیفایا خێرێ و ب لەز بدەتە برینداران.
گەلێ کوردستانێ ژی ھەر سەرفراز و سەربلند یە و بەلێ بەرخوەدان ژیانە.

پەیچێ فەرمی یێ سەرۆکێ ھەرێما کوردستانێ ل سەر تۆرا فەیسبۆکی: ڤێرە کلیک بکە

کۆمێنتا تە