سەرۆک بارزانی، هەردەم کەلها پوولایین بوویە پاراستنا ماف و پێکڤەژیانا پێکهاتەیان
دلۆڤان ئاکرەیی
سەرۆک مەسعود بارزانی هەردەم وەک کەلهەکا پۆڵایین بۆ پاراستنا مافێن هەموو پێکهاتەیێن هەرێما کوردستانێ و ئیراقێ ڕاوەستایە، چ جاران سازش ل سەر ماف و کیانێ دەستووری یا پێکهاتەیێن ئایینی و نەتەوەیی نەکرییە، ب تایبەتی ژی کریستیان، ئێزدی، تورکمان، شەبەک و کەکەیی و د ڤی واری دا، هەڵوێستێ سەرۆک بارزانی ل سەر تەرخانکرن یان ئامادەبوونا وی بۆ قوربانیدانێ ب پۆستێن پارتی دیموکراتی کوردستان ل بەغدا، د پێناڤی پاراستنا مافێن پێکهاتەیان دا، ئاماژەیەکا زەلال یا دیرۆکی یا خەباتا وی یە بۆ دادپەروەری و پێکڤەژیانا ئاشتیانە.
سەرۆک بارزانی باوەریەکا ب هێز ب وێ چەندێ هەیە کو ئیراقا داهاتی تنێ ب هەبوونا هەموو پێکهاتەیان و دابینکرنا مافێن وان ل سەر بنەمایێ وەلاتیبوونێ و ئێکسانیێ دێ سەرکەڤیت و بەردەوام بیت و دەمێ ل پەرلەمانێ ئیراقێ یان دەستەلاتێن ناڤەندی هەول هاتینە دان بۆ کێمکرن یان نەهێلانا مافێن پێکهاتەیان وەکی کورسییێن کۆتایان، سەرۆک بارزانی ل دژی ڕاوەستایە و بەرەڤانیەکا بهێز ژ مافێن وان کریە و دادپەروەری ل سەر هەمی بەرژەوەندییێن حزبی هەلبژارتی یە و سەرۆک بارزانی نیشا دا کو بۆ پاراستنا مافێن ستەملێکریا و پێکهاتەیێن رەسەن، پۆست و پلەیێن سیاسی چ بها و گرنگییەکا مەزن نینن ل دەف وی ئەگەر ببنە قوربانی بۆ ڕەڤاندنا ستەمێ و هەرێما کوردستانێ ب سەرۆکایەتی و مڕوڤدۆستیا سەرۆک بارزانی هەردەم پەنەگەهەکا سەلامەت بوویە بۆ هەموو پێکهاتەیێن بێپەنا دەمێ ل دەڤەرێن دی تووشی زولم و ستەمێ دبوون و پێکڤەژیانا ئاشتیانە د ناڤبەرا پێکهاتەیێن جودا دا ل کوردستانێ بوویە میناکەکا پێشەنگ ل سەر ئاستێ دەڤەرێ و جیهانێ، پێکهاتەیێن نەتەوەیی و ئایینی ل کوردستانێ و ئیراقێ نە پێکهاتەیێن لاوازن، بەلکو دەوڵەمەندیا ڕەسەن یا ڤی وەلاتینە و پاراستنا وان ئەرکەکێ نیشتمانی و مڕوڤایەتییە. سەرۆک مسعود بارزانی هەرتەم ب سیاسەتا خۆ یا حەکیمانە بەرەڤانی ل مافێن پێکهاتان کریە و ب رێکا قوربانیدان ب پۆست و دەستکەفتێن حزبی ل بەغدا و هەرێما کوردستانێ د پێناڤی مافێن پێکهاتەیان دا، کار بۆ بەردەوامیا وێ رێبازا خەباتگێڕی یا بارزانی کریە کو مرۆڤایەتی، دادپەروەری و مافێن رەوا یێن مللەتان هەردەم ل سەرووی هەموو مەرەم و بەرژەوەندییێن تایبەت بوونە.
