سەرۆک وەزیرێن تورکیا: ھەتا شەش مەھێن دی ل سووریێ دێ گوھۆرینێن مەزن روو دەن
ئەڤرۆ نيوز:
سەرۆک وەزیرێن تورکیا دوھی راگەھاند کو نھا ئەو ل گەل روسیا و ئیرانێ سەبارەت ب نەخشێ سووریا نوو کار دکەن و دیار ژی کر کو روسیا ھێزا سەرەکی یە ل سووریێ و مە دڤێت ل گەل ئیرانێ و روسیا پرسا سووریێ چارە بکەین و ئیران ژی وەکو مە ل دژی ھندێ یە کو سووریا بھێتە پارچە کرن.
بینالی یلدرم سەرۆک وەزیرێن تورکیا دوھی د پرێس کۆنفرانسەکێ دا راگەھاند کو روسیا و ئیران ڤێ یەکێ باش دزانن کو تورکیا ھێزەک مەزن ل دەڤەرێ و ژ بەر ھندێ ژی وان دڤێت ئەم پێکڤە قەیرانا سووریێ چارە بکەین و ھەروەسا پێکڤە سووریا نوو ژی ئاڤا کەین و گۆت: (سەرەدانا بەرێز سەرۆک کۆماری بۆ روسیا و ھەروەسا سەرەدانا وەزیرێ دەرڤە یێ ئیرانێ بۆ تورکیا گرنگ بوون و د ھەر دو سەرەدانان دا مە ب رەنگەکێ بەرفرەە بەحسێ سووریا نوو کریە و بەرپرسێن ئیرانێ ژی وەکو مە دبێژن کو نابیت سووریا بھێتە پارچەکرن).
سەرۆک وەزیرێن تورکیا ھەروەسا دیار کر کو پەیوەندیێن مە ل گەل روسیا بێگومان دێ کارتێکرنا خوە ل سەر رەوشا سووریێ بکەن، د سەرەدانا خوە دا بۆ تورکیا سەرۆک کۆماری ژی ل گەل پوتینی ب گشتی بەحسێ سووریا کرینە و روسیا داخواز ژ مە کریە کو ئەم ھاریکار بین بۆ چارەکرنا قەیرانا سووریێ و گۆت: (د شەش مەھێن پێشیا مە دێ گوھۆرینێن مەزن ل سووریێ روو بدەن، نھا کارەک مەزن بۆ ھندێ دھێتە کرن، من نەڤێت زێدە تشتان دیار بکەم، لێ من دڤێت بێژم تورکیا ل گەل روسیا و ئیرانێ سەبارەت ب سووریا نوو گەھشتیە رێککەفتنەکێ و ئەو یەک دێ د ناڤ شەش مەھان دا دیار بیت).
سەبارەت ب کونترول کرنا باژێرێ منبجێ ژ ئالیێ ھێزێن سووریا یا دیموکراتیک ژی سەرۆک وەزیرێن تورکیا راگەھاند کو مە بەری نھا ژی بۆ بەرپرسێن ئەمریکی دیار کربوو کو پشتی منبج بھێتە ئازادکرن دڤێت ھێزێن کوردی ل منبجێ دەربکەڤن و خەلکێ عەرەب یێ منبجێ باژێرێ خوە برێڤە ببەن و ئەم نھا چاڤەرێ ھەلویستێ ئەمریکا نە و دڤێت ئەمریکا ژی سۆزا خوە بجە بینیت.
چاڤدێرێن سیاسی دیار دکەن کو ئەردۆگان ژ بەر بزاڤا کۆدەتایا سەربازی و شەرێ ل دژی جەماعەتا فەتحوللا گولەنی گەلەک تەنگاڤ بوویە و پێدڤی ھاریکاریا روسیایە و ژ بەر ھندێ ژی ئەردۆگان رازیە سەبارەت ب سووریێ تشتێن روسیا دڤێت بۆ بکەت و ل ھەمبەر دا داخواز دکەت کو روسیا پشتەڤانیێ ل کوردێن رۆژئاڤا نەکەت، لێ روسیا ژی ب ساناھی دەستان ژ کوردان بەرنادەت چونکو ژ بۆ شەرێ ل دژی تیرۆرێ و ھەروەسا بۆ پاشەرۆژا سووریێ ژی روسیا پێدڤی ب کوردانە.
