سەرۆک کۆمارێ ئیرانێ: ب چو رەنگەکێ ناھێلین عیراق و سووریێ پارچە ببن
ئەڤرۆ نيوز:
سەرۆک کۆمارێ ئیرانێ حەسەن رۆحانی راگەھاند کو ئەمریکا و وەلاتێن رۆژئاڤا پشتەڤانیا داعشێ دکەن و نھا ژی ب ئەگەرێ شەرێ ل دژی داعشێ دخوازن ل سووریێ و عیراقێ بنگەھێن مەزن یێن سەربازی ئاڤا بکەن و ئەوە ژی دھێتە رامانا داگیرکرنا وان وەلاتان و ئەوە ژی ب چو رەنگەکێ ژ ئالیێ مە ڤە ناھێتە قەبوول کرن و گۆت: (ئەمریکا ل سەر بنەمایێ ستراتیژیا خوە یا نوو کار دکەت و وان دڤێت دەڤەرا رۆژھەلاتا ناڤین بێخنە ناڤ شەرەکی دەمدرێژ و ژ بۆ ھندێ ژی وان عیراق و سووریێ پارچە بکەن و چەند وەلاتێن نوو ل دەڤەرێ ئاڤا بکەن و ئەوە ژی دھێتە رامانا شەرەکی دەمدرێژ ل دەڤەرا مە و ئەو یەک د بەرژەوەندیا خەلکێ دەڤەرێ دا نینە).
سەرۆک کۆمارێ ئیرانێ د بەردەوامیا ئاخڤتنا خوە دا ئەو یەک ژی راگەھاند کو پارچەکرنا عیراق و سووریێ دێ شەرمێ مەزھەبی ل دەڤەرێ بەرفرەھتر دکەت و ئارمانجا ئەمریکا ژی ئەوە و ژ بەر ھندێ ئەم وەک ئیرانێ دێ ھەتا دووماھیێ بزاڤێ کەین کو تشتەکێ وەسا نەھێتە کرن و گۆت: (نھا ھێزێن مە ل عیراق و سووریێ شەرێ داعشێ دکەن، ھەروەسا دەمێ پێدڤی بیت ئەم دێ ھێزێن زێدەتر ژی رەوانەی ھەر دو وەلاتان بکەین، چونکو ئارمانجا مە پاراستنا وان وەلاتان و ھەروەسا دابینکرنا ئارامیێ یە ل دەڤەرا رۆژھەلاتا ناڤین و دڤێت ھەموو ئالی بزانن کو ئەمریکا و وەلاتێن رۆژئاڤا دخوازن ل سەر بنەمایێ شەرێ مەزھەبی و تایفی دەستھەلاتا خوە ل دەڤەرێ ب ھێز بکەن و زۆرداریێ ل خەلکێ بکەن).
سەرۆک کۆمارێ ئیرانێ د پشکەکا دی یا ئاخڤتنا خوە دا دیار کر کو ئیران خوەدان ھێزەکا گەلەک مەزنە و دێ رێگریێ ل پیلانێن ئەمریکا کەت، چونکو گوھۆرینا نەخشێ سیاسی یێ رۆژھەلاتا ناڤین د بەرژەوەندیا چو کەسەکێ دا نینە، شەرێ نھا دھێتە کرن بۆ لاوازیا دەڤەرێ یە و مفادارێ شەرێ داعشێ ژی تنێ ئەمریکا و وەلاتێن رۆژئاڤانە و ژ بەر ھندێ دڤێت وەلاتێن رۆژھەلاتا ناڤین ب رەنگەکێ باش سەرەدەریێ ل گەل روودانێن نھا بکەن و نەبنە پشکەک ژ پیلانا ئەمریکا و گۆت: (یێن نھا ب بەھانا شەرێ ل دژی داعشێ دخوازن بھێنە عیراق و سووریێ وان بخوە داعش دروست کر و ھەتا نھا ژی پشتەڤانیێ ل وێ رێکخراوا تیرۆرستی دکەن، کریارێن داعشێ زیانەکا مەزن گەھاندیە ھەموو موسولمانان و چو پەیوەندیا داعشێ ل گەل ئایینێ پیرۆز یێ ئیسلامێ نینە).
د دووماھیا ئاخڤتنا خوە دا سەرۆک کۆمارێ ئیرانێ ئەو یەک ژی نەڤەشارت کو دڤێت وەلاتێن رۆژھەلاتا ناڤین پێکڤە ستراتیژیەکێ بۆ شەرێ دژی داعشێ دارێژن و پێکڤە شەرێ وێ رێکخراوا درندە بکەن، چونکو د دەمێن بۆری بۆ ھەموو کەسەکێ ئاشکرا بوو کو ئەمریکا و وەلاتێن ھەڤپەیمان د شەرێ ل دژی داعشێ دا جدی نینن و ل گۆر بەرژەوەندیێن خوە سەرەدەریێ ل گەل وێ رێکخراوێ دکەن، ژ بەر ھندێ ژی د ماوەیێ بۆری دەمەکێ داعش گەلەک لاواز ببوو، بەس ھێزێن ھەڤپەیمان ھێرشێن خوە دانە راگرتن و داعشێ جارەکا دی ھێرشی چەندین دەڤەرێن نوو ل عیراق و سووریێ کر و گۆت: (ھەتا وەلاتێن ھەرێمێ بخوە شەرێ داعشێ نەکەن، ئەو رێکخراوا تیرۆرستی ژناڤ ناچیت، داعش کارتەکە دھێتە بکارئینان بۆ پارچەکرنا عیراق و سووریێ و ئەم ب چو رەنگەکێ ناھێلین ئەو ھەر دو وەلاتە پارچە ببن و یا ژ دەستێ مە بھێت ئەم دێ کەین).
