سەرۆک کۆمارێ چیک مزگینەکا خۆش ددەتە کوردان
ئەڤرۆ نیوز:
سەرۆک کۆمارێ چیکێ د بەرنامەکێ تەلەفزیۆنی دا راگەھاند کو رۆژھەلاتا ناڤین بەر ب گوھۆرینێن مەزن ڤە دچیت و دێ گەلەک وەلات ھێنە پارچە کرن و دێ دەولەتا کوردی ژی د دەمەکێ نێزیک دا ھێتە راگەھاندن و دەمێ سەرۆکێ ھەرێما کوردستانێ سەرەدانا وەلاتێ مە کری وی دەمی ژی من دیار کربوو کو دڤێت کورد ببنە خوەدان دەولەت و ب خوە بریارێ ل سەر چارەنڤیسێ خوە بدەن.
میلۆس زەمان سەرۆک کۆمارێ وەلاتێ چیکێ د بەرنامەکێ تەلەفزیۆنا پریما یا وەلاتێ خوە دا دیار کر کو رۆژھەلاتا ناڤین کەڤتیە بەر پێلەکا بلەز یا گوھۆرینان و شەرێ نھا و ئەو ئالۆزیێن کو روو ددەن ژی ھەموو نیشانا ھندێ نە کو ئێدی نەخشێ بەرێ یێ وێ دەڤەرێ دێ ژناڤ چیت و دێ ھەموو تشتەک ژ نوو ڤە ھێتە دیار کرن و گۆت: (دێ گەلەک وەلات پارچە بن، چونکو قەیرانا نھا یا ل وێ دەڤەرێ نیشا ددەت کو نەخشێ بەرێ ل سەر بنەمایێ ئیرادا خەلکی نەھاتیە دیار کرن و ب سالانە ژی قەیران یا بەردەوامە و ژ بەر ھندێ دێ ب پارچەبوونا چەندین وەلاتان دەولەتێن نوو ژی ھێنە ئاڤاکرن و ئێک ژ وان دەولەتان دەولەتا کوردی یە کو ئەز ب خوە وەسا دبینم چ نەمایە دێ دەولەتا کوردی ھێتە راگەھاندن).
سەرۆک کۆمارێ وەلاتێ چیکێ د پشکەکا دی یا ئاخڤتنا خوە دا ئەو یەک ژی دیار کر کو دەمێ سەرۆکێ ھەرێما کوردستانێ مەسعود بارزانی سەرەدانا وەلاتێ وان کری وی دەمی ئەم سەبارەت ب گەلەک بابەتان ئاخڤین و من پشتەڤانیا وەلاتێ مە بۆ کوردستانێ دیار کر، چونکو مافێ کوردانە وەک ھەموو گەلێن دی یێن جیھانێ ببنە خوەدان دەولەتا خوە و گۆت: (نھا ھەموو تشت بۆ راگەھاندنا دەولەتا کوردی تەمامن، ھەرێما کوردستانێ وەک وەلاتەکی سەربخوە د ھەموو بیاڤەکێ دا کاروبارێن خوە برێڤە دبەت و د بارودوخەکێ گەلەک نەخوەش یێ شەری ژی دا وێ دەڤەرێ شیا کو ب رەنگەکێ باش بەرگیریێ ژ خوە بکەت و سەرەرای گەلەک ئاریشان ژی شیان وەک دەولەتەکا ب ھێز شەرێ تیرۆرێ بکەن و ژ بەر ھندێ ژی ئەز دبێژم دڤێت وەلاتێن رۆژئاڤا ژی پشتەڤانیا خوە بۆ دەولەتا کوردی دیار بکەن).
سەبارەت ب ھەلویستێ تورکیا ژی ناڤھاتی دیار کر کو تورکیا ژ بەر کوردان ل ھەمبەر داعشێ ھەتا نھا ژی بێدەنگ مایە و وەک پێدڤی شەرێ وێ رێکخراوێ نەکریە، ئەو یەک ژی شاشیەکا گەلەک مەزنە و تورکیا ب ئێخستنا فرۆکا روسیا شاشیەکا دیرۆکی کر و ئەز ب باوەرم دێ د دەمێن داھاتی دا ئەو یەک پتر کاریگەریا خوە ل تورکیا کەت و گۆت: (دڤێت تورکیا ل ھەمبەر ئاڤابوونا دەولەتا کوردی چو ئاستەنگیان دروست نەکەت، چونکو ھەکە بەرپرسێن تورکیا کارەکێ وەسا بکەن دێ زەرەمەندێ یەکێ ئەو بن، چونکو ئێدی ھەموو وەلاتێن جیھانێ دبینن کو دەم ھاتیە دەولەتا کوردی بھێتە راگەھاندن و ل گۆر دیتنا من ژی چو نەمایە و ئەز ب باوەرم د دەمەکێ گەلەک نێزیک دا ئەم دێ راگەھاندنا وێ دەولەتێ بینین و دەمێ مەسعود بارزانی سەرەدانا وەلاتێ مە کری من وی دەمی ژی گۆتێ دەم ھاتیە دەولەتا کوردی بھێتە راگەھاندن).