سەرەدانێن کورد و سونان بۆ ئەمریکا بۆ بجھئینانا پرۆژێ جۆ بایدنی یە
ئەڤرۆ:
عەلی شبر ئێک ژ سەرکردێن جڤاتا بلند یا ئیسلامی ب سەرۆکاتیا عەمار حەکیم راگەھاند سەرەدانێن ڤێ دووماھیێ یێن سەرکردێن کوردان و سونان بۆ بجھئینانا پرۆژێ (جۆ بایدن) ی یە یێ پارچەکرنا عیراقێ.
عەلی شبر بۆ رۆژناما ئەڤرۆ گوت” ئەم وەکو جڤاتا بلند یا ئیسلامی و ھەموو لایەنێن نیشتمانی یێن عیراقێ ل گەل عیراقەکا ئێکگرتی و فیدرالی نە و ھەموو پێکھاتێن عیراقێ د چارچۆڤێ دەولەتا عیراقێ دابن و ھەر ژ دەستپێکا دامەزراندنا دەولەتا عیراقێ کورد و عەرەب و تورکمان و ئاشووری و ھەموو پێکھاتێن دی دناڤ ڤێ دەولەتێ دا ھەبوون، مە نوکە دستوورەکێ ھەی و پێدڤیە د پێگیر بین ب وی دستووری و سەرپێچیا وی نەکەین”.
ب دیتنا عەلی شبری” ھندەک لایەنێن دەرڤە یێن ھەین دخوازن پلانا پارچەکرنا عیراقێ بجھبینن بۆ لاوازکرنا وێ، بەلێ گەلەک دەولەت ب تایبەتی یێن دەوروبەرێ عیراقێ دژی پلانا پارچەکرنا عیراقێ نە بۆ سێ دەولەتان کو بەردەوام د شەڕی دابن ل گەل ھەڤدۆ”.
د بەرسڤەکا پرسیارا رۆژناما ئەڤرۆ دا، ئایا ب دیتنا ھەوە نوکە عیراقەکا ئێکگرتی و فیدرالی ھەبوونا خوە ھەیە؟ عەلی شبر دبێژیت”نوکە ھندەک بزاڤێن ھەین بۆ وێ چەندێ عیراقەکا ئێکگرتی و ب ھێز ھەبیت، لێ د ھەمان دەم دا ژی ھندەک بزاڤ ژی یێن ھەین بۆ لاوازکرنا عیراقێ و پەیداکرنا ھەڤڕکیان، ھەکە عیراقی د راستگۆبن ل گەل ھەڤدو بۆ پاراستنا ئێکگرتنا وەلاتێ خوە، چو لایەن نەشێن کارتێکرنێ ل نەخشێ عیراقێ بکەن”.
ب دیتنا ڤی سەرکردێ جڤاتا بلند یا ئیسلامی پرۆژێ پارچەکرنا عیراقێ پتر ژ لایێ (جۆ بایدن) ی ڤە یێ ھاتیە دیارکرن بۆ پارچەکرنا عیراقێ بۆ سێ دەولەتان و رامانا وی پرۆژەی ئەوە کو ئەمریکا و ھندەک وەلاتێن دی دیتنەکا پاشەرۆژی بۆ پارچەکرنا عیراقێ یا ھەی، دەمێ ھەرێما کوردستانێ ژ ناڤەندێ (بەغدا) دوور دکەڤیت و ناڤەند مەرەمێن ھەرێمێ نەزانیت کا چو دڤێت، ئانکو ئەڤە عیراق ھاتە پارچەکرن”.
سەبارەت سەرەدانێن ڤێ دووماھیێ یێن سەرۆکێ ھەرێما کوردستانێ و ھندەک ژ سەرکردێن سونان بۆ ئەمریکا، عەلی شبر گوت” رافع عیساوی ئێک ژ وان سەرکردانە یێن سەرەدانا ئەمریکا کری و یێ تۆمەتبارە و داخوازکریە بۆ دادگەھێ ل عیراقێ، بزاڤێن ئەمریکا یێن لڤینا ڤی لایەنی و لایەنێ دی، رامانا وێ ئەوە مایتێکرنەکا دیارە د کاروبارێن ناڤخوەیی یێن عیراقێ دا و بجھئینانا پرۆژێ (جۆ بایدنی) یە، ئەمریکا و ئیسرائیل بۆ دوبارە دیارکرنا نەخشێ دەڤەرا رۆژھەلاتا ناڤین، پێدڤی ب چەندین پلانانە و پشتی سەقای و بارودۆخی بەرھەڤ دکەن، دبیت پرۆژێ پارچەبوونێ ل دەف لایەنێن سیاسی ل عیراقێ یێ پەسەند کری بیت”.
گوت ژی”پێدڤیە حوکمەتا عیراقێ ھەلویست ل دۆر ڤێ چەندێ ھەبیت و پێدڤیە ئەم بزڤرین و ل گەل ھەڤ بژین، یان ژی ڤی چەندێ شرۆڤەکرنەکا دی یا ھەی و ئەم یێ بەر ب پارچەبوونا عیراقێ و لاوازبوونا وێ ڤە دچین”.
