سەلمان شێخ مەمی و بلند ئیبراهیم دێ هندەک کارێن نوی پێکڤە ئەنجام دەن
هەرهین محەمەد:
هەلبەستڤان سەلمان شێخ مەمی د دیدارەکێ دا بۆ بەرپەڕێ هونەری یێ ڕۆژنامەیا ئەڤرۆ گۆت: من چو جاران زۆری ل چو سترانبێژان نەکریە کو هەڵبەستا من بێژیت. هەر هەڵبەستەکا من دایە هونەرمەندەکی، ب دڵێ وان بوویە و ئەو ژێ ڕازی بوویە. سترانبێژ ب ڤیان و دیڤ دڵێ خوە دبیژت، ڤێجا پاشان هونەرمەند دشێت ڕولێ خوە تێدا ببینێت،هەموو ئەو سترانبێژێن قەستا من دکەن و حەز ژ پەیڤێن من دکەن و من هەڵدبژێرن، ب بێگومان ئەگەر ژێ ڕازی نەبن قەستا من ناکەن و سەبارەت ب هونەرمەند بلند ئیبراهیم ژی، ئەو گەلەک ژ هەڵبەستێن من ڕازییە و جهێ خوە د دڵێ وی دا گڕتیە.
زێدەتر ژی گۆت: ئەز هەڵبەستێ بۆ تڕێندان چێناکەم و چ جاران ژی من بۆ هندێ نەنڤێسیە کو ناسناڤەکی بگرم یان ب ئاخڤتنا عەرەبی «شهرەت»ێ ب دەستڤە بینم. ئەز هەڵبەستێ بتنی بۆ دڵێ خوە دنڤێسم، دڵێ خوە پێ خوەش دکەم، ئەڤە ڕاستیا منە و ئەز هەڤڕکیێ دگەل چو هەڵبەستڤانان ناکەم، هەموو هەڵبەستڤان خوەشتڤینە هەر ئێک ژ وان ب ڕێیا خوە و ب شێوازێ خوە کار دکەت؛ جیهانا هەڵبەستێ وەک تاڤگەکا ئاڤاهیانە، هەر خانیەک ب ڕەنگەکییە، هەر هەڵبەستڤانەک ژی ب ڕەنگ و هەستەکێ تایبەت دەربڕینێ ژ هەستێن خوە دکەت.
سەلمانی ئەو چەندە ژی گۆت: ئەو هەڵبەستێن دبنە ستران، دشێم بێژم خوە هەڵبەستێن من یێن ئازاد ژی دکەڤنە د قالبێ سترانێ دا، بەلێ بەهرا پتر، ئەو هەڵبەستێن ل سەر وەزن و قافیەیێ دهێنە نڤێسین، ئەڤە هەڵبەستێن دروستێن سترانێنە. د هەمان دەم دا، هەڵبەستێن منێن ئازاد ژی ئەز ب کێشەکا تایبەت و موزیکەکا تایبەت چێدکەم، کو تە کێش و قافیەکا دەنگی تێدا هەبێت.
بۆ نموونە سترانا «کا یارامن »، هەڵبەستەکا ئازادە، لێ ڕیتم و دیکێ وێ تەواو ئێکێن سترانێنە
هەروەسا گۆت:هەڵبەستێن من پێشکێشن بۆ جڤاتا دڵداریا. ڕوودان و سەربۆڕێن ژیانا من یێن کو ب سەری من هاتین، ئەز وەسا هەڵبەستێ دنڤێسم. کا ژیانێدا چ ب سەری هاتیە، دانمە سەر کاغەزێ و دکەمە هەلبەست؛ ئانکو ژدەردێ منن. ئەگەر برینەک د دڵێ تە دا بت، د دەستێ تە دا بت یان د سەرێ تە دا بت، هەر برینە و جیاوازی نینە. ل سەر ڤێ چەندێ دشێم بێژم: ژیانا من هەڵبەستا منە، و هەڵبەست ژیانا منە.
ل دۆر نووترین بەرهەمێن خوە سەلمانی گۆت:دیوانا ئێکێ (تاجا کوردان): نزیكی پێنجی هەڵبەستان پێکدهێت. ئەڤە ئەو هەڵبەستەنە کو بووینە سرۆدێن نەتەوەیی، وەکو مەنجەلا پێشمەرگە و بامیان و تاجا کوردان.
دیسان دیوانا دووێ (گوڵبوهار): ژ 96 هەڵبەستان پێکدهێت. بارا پتری وان هەڵبەستێن دڵدارینە، هەروەسا هەندەک ژوان بۆ شەهیدان و بۆ بووینە و ئەگەرێن جودا دیارکرینە. ل داهاتیەکێ نزیک دێ چنە د چاپێ دا.
ل دووماهیێ ژی گۆت: ل ڤێ دووماهیێ ئەز و هونەرمەند بڵند ئیبراهیم پێکڤە بووین. گەلەک ژ هۆزانێن من ئاواز بۆ هاتینە چێکرن، و ل دەمەکێ نزیک دا، نزیکی سێ هەتا پێنچ سترانێن نوو دێ هێنە بەلاڤکرن، کار ب تەواوی ل دووڤ حەز و ڤیانا حەز ژێکەرێن دەنگێ بڵندی هاتیە ئامادەکرن. باوەرم دێ د وەسا بن کو گوهدار ژی دێ گەلەک کەیفخۆش بن ب ڤان سترانێن د ڕێ دا.
